മുംബൈ: യുവതി  ഓണ്‍ലൈന്‍ വഴി വാങ്ങിയ ഐസ്‌ക്രീമിനുള്ളില്‍ മനുഷ്യ വിരലിന്റെ കഷണം കണ്ടെത്തിയതായി റിപോര്‍ട്ട്. മുംബൈയിലാണ് ഞെട്ടിപ്പിക്കുന്ന സംഭവം. മുംബൈയിലെ മലാഡിലുളള യുവതി ഫുഡ് ഡെലിവറി ആപ്പായ സെപ്‌റ്റോ വഴിയാണ് ഐസ്‌ക്രീം ഓര്‍ഡര്‍ ചെയ്തത്.

ഐസ്‌ക്രീം കഴിക്കുന്നതിനിടെയാണ് വിരലിന്റെ കഷണം കണ്ടെത്തിയതെന്ന് വാര്‍ത്താ ഏജന്‍സിയായ എഎന്‍ഐ റിപോര്‍ട്ട് ചെയ്തു. തുടര്‍ന്ന് യുവതി മലാഡ് പൊലിസ് സ്റ്റേഷനിലെത്തി ഐസ്‌ക്രീം കമ്പനിക്കെതിരേ കേസ് രജിസ്റ്റര്‍ ചെയ്യുകയായിരുന്നു. യുമ്മോ എന്ന കമ്പനിയുടേതാണ് ഐസ്‌ക്രീം.

പരാതിയുടെ അടിസ്ഥാനത്തില്‍ ഐസ്‌ക്രീം സാംപിളും മനുഷ്യവിരലിന്റെ കഷണവും ഫൊറന്‍സിക് പരിശോധനയ്ക്കായി അയച്ചിട്ടുണ്ടെന്ന് മുതിര്‍ന്ന പൊലിസ് ഉദ്യോഗസ്ഥന്‍ അറിയിച്ചു. സംഭവത്തില്‍ അന്വേഷണം ആരംഭിച്ചിട്ടുണ്ടെന്നും പൊലിസ്. ഐസ്‌ക്രീം നിര്‍മിച്ച് പായ്ക്ക് ചെയ്ത സ്ഥലത്തും പൊലിസ് പരിശോധന നടത്തുമെന്നും ഫ്രീ പ്രസ് ജേണലും റിപോര്‍ട്ട് ചെയ്തു.