കട്ടപ്പന: ഭാര്യയെ കാണാനെത്തിയ യുവാവിനെ അയല്‍വാസിയായ മധ്യവയസ്‌കന്‍ വെട്ടിക്കൊലപ്പെടുത്തി. ഭാര്യവീട്ടിലെത്തിയ കക്കാട്ടുകട കളപ്പുരയ്ക്കല്‍ സുബിന്‍ ഫ്രാന്‍സിസ് (35) ആണ് മരിച്ചത്. കൊലപാതകം നടത്തിയ സുവര്‍ണഗിരി വെണ്‍മാന്തറ ബാബുവിനെ (58) പൊലിസ് കസ്റ്റഡിയിലെടുത്തിട്ടുണ്ട്. ഇയാള്‍ ലഹരിക്ക് അടിമയാണെന്നാണ് കിട്ടിയ വിവരം.

ഇന്നലെ വൈകിട്ട് ഏഴോടെ സുവര്‍ണഗിരി ഭജനമഠം ഭാഗത്തായിരുന്നു സംഭവം നടന്നത്. ഗര്‍ഭിണിയായ ഭാര്യയെ കാണാനാണ് ഭര്‍ത്താവ് സുബിന്‍ വന്നത്. ഇതിനിടെ അയല്‍വാസിയായ ബാബുവുമായി വാക്കുതര്‍ക്കം ഉണ്ടാവുകയും ഇയാള്‍ കോടാലികൊണ്ട് വെട്ടുകയുമായിരുന്നു എന്നാണ് പൊലിസ് നല്‍കുന്ന വിവരം.

ഉടന്‍തന്നെ ബാബുവിനെ ആശുപത്രിയില്‍ എത്തിച്ചെങ്കിലും മരിക്കുകയായിരുന്നു. ആക്രമണത്തിനുശേഷം വീടിനുള്ളില്‍ ഒളിച്ച ബാബുവിനെ പിടികൂടാന്‍ എത്തിയ പൊലിസിനെയും ഇയാള്‍ ആക്രമിക്കുകയായിരുന്നു. ഭാര്യ: ലിബിയ. മകള്‍: എസ്സ.