അബൂദബി: അല്‍ഐന്‍ നഗരത്തില്‍ ഇന്നുമുതല്‍ വിവിധ പാര്‍ക്കിങ് നിയമങ്ങള്‍ കര്‍ശനമാക്കി. നിയമം ലംഘിക്കുന്നവര്‍ക്കെതിരേ നടപടി സ്വീകരിക്കും. അബൂദബി മൊബിലിറ്റി (എ.ഡി മൊബിലിറ്റി) പ്രതിനിധീകരിക്കുന്ന ഡിപ്പാര്‍ട്ട്‌മെന്റ് ഓഫ് മുനിസിപ്പാലിറ്റി ആന്‍ഡ് ട്രാന്‍സ്‌പോര്‍ട്ട് വെഹിക്കിള്‍ ടോവിങ് സേവനത്തിനു തുടക്കമിട്ടതോടെ കര്‍ശന നിയന്ത്രണങ്ങള്‍ നിലവില്‍ വന്നു. 

പാര്‍ക്കിങ് ഏരിയയില്‍ ലൈസന്‍സ് പ്ലേറ്റില്ലാതെ കണ്ടെത്തുന്ന വാഹനങ്ങള്‍ അല്‍ ഐന്‍ വ്യവസായ മേഖലയിലെ മവാഖിഫ് വെഹിക്കിള്‍ ഇമ്പൗണ്ടിങ് യാര്‍ഡിലേക്ക് ഉടന്‍ കൊണ്ടുപോകും. വാഹനങ്ങള്‍ വില്‍പനയ്ക്കായി പ്രദര്‍ശിപ്പിക്കുകയോ വാണിജ്യപരമോ പരസ്യമോ പ്രമോഷണല്‍ ആവശ്യങ്ങള്‍ക്കോ ഉപയോഗിച്ചാല്‍ നടപടി സ്വീകരിക്കും.