അമ്പലപ്പുഴ: ഒ.പി കൗണ്ടറില്‍ ജീവനക്കാരുടെ കുറവ് ചീട്ട് എടുക്കാനായി എത്തുന്ന രോഗികളെ വലയ്ക്കുന്നു. ചീട്ടെടുക്കാനായി രോഗികള്‍ മണിക്കൂറോളം ക്യുവില്‍ നില്‍ക്കേണ്ട അവസ്ഥയാണ്.
ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ എത്തുന്ന രോഗികള്‍ക്കാണ് ഈ ദുരാവസ്ഥ. ഒ.പി കൗണ്ടറില്‍ ആകെ ഉള്ളത് മൂന്ന് ജീവനക്കാരാണ. ഒരു കൗണ്ടര്‍ പുതിയ ചീട്ട് നല്‍കാനും മറ്റൊന്ന് പുതുക്കാനും മൂന്നാമത്തേത് കുട്ടികള്‍ക്ക് ചീട്ട് നല്‍കാനുമാണ്. ഇത് മൂന്നും ഒരു മുറിയ്ക്കുള്ളിലാണ്. ഇവിടെ എത്തുന്ന രോഗികളുടെ എണ്ണമാകട്ടെ 1500 ന് അടുത്തു വരും. രാവിലെ 9 മണി മുതല്‍ 11 മണി വരെയാണ് ഒ.പി കൗണ്ടറുകളുടെ പ്രവര്‍ത്തസമയം.
എന്നാല്‍ രാവിലെ 7 മണി മുതല്‍ തന്നെ രോഗികള്‍ ക്യൂവില്‍ അണിനിരന്നു കഴിയും. ഇതേ തുടര്‍ന്ന് ഒരു മണി വരെ ഒ.പി കൗണ്ടര്‍ പ്രവര്‍ത്തിപ്പിയ്ക്കണ്ട ഗതികേടിലാണ് ജീവനക്കാരും. ജിവനക്കാരും അവശരായ രോഗികളും പച്ചവെള്ളം പോലും കുടിയ്ക്കാതെ ക്യൂ നില്‍ക്കേണ്ട ഗതികേടിലാണ്. തിങ്കള്‍,ബുധന്‍ വ്യാഴം ഈ ദിവസങ്ങളില്‍ പ്രവര്‍ത്തിയ്ക്കുന്ന ന്യൂറോ മെഡിസിന്‍. ന്യൂറോ സര്‍ജറി,: നെഫ്‌റോളജി, യൂറോളജി തുടങ്ങിയ ഒ.പിയില്‍ പരിശോധനയ്ക്കായി ഡോക്ടറെ കാണാനായി രോഗികള്‍ എത്തുമ്പോള്‍ ഒ.പി സമയം കഴിഞ്ഞിരിക്കും. ഇത് നിര്‍ദനരായ രോഗികളെ വലയ്ക്കുകയാണ്. ആലപ്പുഴ ജില്ലയുടെ നാനാഭാഗത്ത് നിന്ന് മാത്രമല്ല ജില്ലയ്ക്ക് പുറത്തുള്ളവരും വണ്ടാനം ആശുപത്രിയില്‍ ചികിത്സക്കായി എത്തുന്നുണ്ട്.
അനേകം പേര്‍ സമയം കഴിഞ്ഞ് ഒ.പി പ്രവര്‍ത്തിയ്ക്കാത്തതിനാല്‍ നിരാശയോടെ മടങ്ങി പോകാറാണ് പതിവ്. തിങ്കള്‍ മുതല്‍ ശനിവരെയാണ് മെഡിസിന്‍ ഒ.പി. പല രീതിയിലുള്ള ശാരീരിക അവശതകളുമായി വരുന്ന വയോവൃദ്ധജനങ്ങലും ക്യൂവില്‍ നിന്ന് വലയാറാണ് പതിവ്. തിങ്കള്‍,ബുധന്‍,വ്യാഴം ദിവസങ്ങളിലെങ്കിലും കൂടുതല്‍ ജീവനക്കാരെ ഒ.പി കൗണ്ടറില്‍ നിയമിക്കണമെന്ന ആവശ്യം ശക്തമായിട്ടും അധികൃതരുടെ ഭാഗത്ത് നിന്നും യാതൊരു നടപടിയും ഉണ്ടായിട്ടില്ല.