മുംബൈ: രാമായണത്തെ പരിഹസിക്കുന്ന സ്‌കിറ്റ് അവതരിപ്പിച്ചെന്നാരോപിച്ച് ബോംബെ ഐ.ഐ.ടി. എട്ട് വിദ്യാര്‍ഥികള്‍ക്ക് പിഴ. മാര്‍ച്ച് 31 ന് ഇന്‍സ്റ്റിറ്റ്യൂട്ടിന്റെ പെര്‍ഫോമിംഗ് ആര്‍ട്‌സ് ഫെസ്റ്റിവലിലാണ് രാഹോവണ്‍ എന്ന പേരില്‍ നാടകം അവതരിപ്പിച്ചത്. 

നാടകത്തില്‍ ഹിന്ദു ഇതിഹാസമായ രാമായണത്തെയും ഹിന്ദു വിശ്വാസങ്ങളെയുംഅപകീര്‍ത്തിപ്പെടുത്തുന്ന പരാമര്‍ശങ്ങളുണ്ടെന്ന് ആരോപിച്ച് ഒരു വിഭാഗം വിദ്യാര്‍ഥികള്‍ പരാതി നല്‍കിയിരുന്നു. ഇതിന്റെ അടിസ്ഥാനത്തിലാണ് നടപടിയെടുത്തത്. ഫെമിനിസം പ്രോത്സാഹിപ്പിക്കുന്നതിന്റെ മറവില്‍ നാടകം സാംസ്‌കാരിക മൂല്യങ്ങളെ പരിഹസിച്ചതായി പരാതിപ്പെട്ട വിദ്യാര്‍ഥികള്‍ ആരോപിക്കുന്നു. 

നാലുവിദ്യാര്‍ഥികള്‍ക്ക് ഒരു സെമസ്റ്ററിന്റെ ട്യൂഷന്‍ ഫീസായ 1.2 ലക്ഷം രൂപയും മറ്റുനാലുപേര്‍ക്ക് 40,000 രൂപവീതവുമാണ് പിഴ. ബിരുദധാരികളായ വിദ്യാര്‍ഥികള്‍ക്ക് ഇന്‍സ്റ്റിറ്റ്യൂട്ടിന്റെ ജിംഖാന അവാര്‍ഡുകളില്‍ നിന്നുള്ള വിലക്ക് ഉള്‍പ്പെടെയുള്ള അധികനടപടികളും നേരിടണം. ജൂനിയര്‍ വിദ്യാര്‍ഥികളെ ഹോസ്റ്റല്‍ സൗകര്യങ്ങളില്‍നിന്ന് ഡീബാര്‍ ചെയ്തു.

മേയ് എട്ടിന് അച്ചടക്ക സമിതിയോഗം ചേരുകയും ജൂണ്‍ നാലിന് പിഴശിക്ഷ പ്രഖ്യാപിക്കുകയുമായിരുന്നു. വ്യാഴാഴ്ചയാണ് പിഴത്തുക അടയ്ക്കാനുള്ള അവസാനതീയതി. പിഴയടക്കാത്തപക്ഷം മറ്റ് നടപടികളുണ്ടാവും.