സെന്റ് വിന്‍സെന്റ്: ബംഗ്ലാദേശിനെ മറികടന്ന് അഫ്ഗാനിസ്ഥാന്‍ ടി20 ലോകകപ്പിന്റെ സെമി ഫൈനലില്‍. സൂപ്പര്‍ എട്ട് ഗ്രൂപ്പ് ഒന്നിലെ നിര്‍ണായക മത്സരത്തില്‍ എട്ട് റണ്‍സിനായിരുന്നു അഫ്ഗാനിസ്ഥാന്റെ ജയം. അഫ്ഗാന്റെ സെമി പ്രവേശനത്തോടെ ഓസ്ട്രേലിയ പുറത്തായി. 

ജയത്തോടെ ഒന്നാം ഗ്രൂപ്പില്‍ അഫ്ഗാനിസ്ഥാന് നാലു പോയിന്റായി. മൂന്നാമതുള്ള ഓസ്‌ട്രേലിയയ്ക്ക് രണ്ട് പോയിന്റുകള്‍ മാത്രമാണുള്ളത്. ഇന്നലെ നടന്ന ഇന്ത്യയ്‌ക്കെതിരായ മത്സരത്തിലെ തോല്‍വിയാണ് ഓസീസിന് തിരിച്ചടിയായത്. സെമിയില്‍ ദക്ഷിണാഫ്രിക്കയാണ്, അഫ്ഗാനിസ്ഥാന്റെ എതിരാളി. 

ആദ്യം ബാറ്റു ചെയ്ത അഫിഗാനിസ്ഥാന്‍ അഞ്ചു വിക്കറ്റ് നഷ്ടത്തില്‍ 115 റണ്‍സെടുത്തിരുന്നു. മഴ കാരണം ബംഗ്ലാദേശിന്റെ വിജയലക്ഷ്യം 19 ഓവറില്‍ 114 റണ്‍സായി പുതുക്കി നിശ്ചയിച്ചു. എങ്കിലും ബംഗ്ലാദേശ് 17.5 ഓവറില്‍ എല്ലാവരും പുറത്തായി. 12.1 ഓവറില്‍ ജയിച്ചിരുന്നെങ്കില്‍ ബംഗ്ലാദേശിനും സെമി കടക്കാമായിരുന്നു. പിന്നീടുള്ള ഓവറുകളിലാണ് ബംഗ്ലാദേശ് മത്സരം ജയിക്കുന്നതെങ്കില്‍ ഓസ്‌ട്രേലിയയും സെമിയിലെത്തുമായിരുന്നു. എന്നാല്‍ അഫ്ഗാന്റെ പോരാട്ടവീര്യത്തില്‍ ചരിത്രത്തിലാദ്യമായി ടീം ടി20 ലോകകപ്പിന്റെ സെമിയില്‍ പ്രവേശിച്ചു.

അതേസമയം, സൂപ്പര്‍ എട്ടിലെ ഒരു കളിയും ജയിക്കാതെയാണ് ബംഗ്ലാദേശ് മടങ്ങുന്നത്. നാല് വിക്കറ്റെടുത്ത റാഷിദ് ഖാനാണ് അഫ്ഗാനുവേണ്ടി തിളങ്ങിയത്.