കല്‍പ്പറ്റ: വയനാട് തലപ്പുഴയില്‍ കുഴിബോംബ് കണ്ടെത്തി. മക്കിമല മേഖലയിലാണ് കുഴി ബോംബ് കണ്ടെത്തിയത്.ബോംബ് സക്വാഡ് സ്ഥലത്തെത്തി എല്ലാം നിര്‍വീര്യമാക്കി. വനത്തിനോട് ചേര്‍ന്ന് ഫെന്‍സിങ് ഉള്ളിടത്താണ് കുഴിച്ചിട്ട നിലയില്‍ സ്‌ഫോടക വസ്തുക്കള്‍ കണ്ടെത്തിയത്. 

വനവകുപ്പ് ഉദ്യോഗസ്ഥരാണ് പ്രദേശത്ത് കുഴി ബോംബ് കണ്ടെത്തിയത്. തുടര്‍ന്ന് പൊലീസിനെ വിവരം അറിയിക്കുകയായിരുന്നു. മാവോയിസ്റ്റുകള്‍ സ്ഥിരമായി വന്നു പോകുന്ന മേഖലയിലാണ് കുഴി ബോംബ് കണ്ടെത്തിയതെന്ന് പൊലീസ് അറിയിച്ചു.

മാവോയിസ്റ്റുകളാണോ കുഴി ബോംബ് വച്ചതെന്ന കാര്യത്തില്‍ സ്ഥിരീകരണം വന്നിട്ടില്ല. സംഭവത്തില്‍ പൊലീസ് അന്വേഷണം ആരംഭിച്ചു.