ദുബൈ: ഈ വര്‍ഷത്തെ ദുബൈ സമ്മര്‍ സര്‍പ്രൈസസ് (ഡി.എസ്.എസ്) പരിപാടികള്‍ അധികൃതര്‍ പ്രഖ്യാപിച്ചു. ജുമൈറ ബ്ലൂ വാട്ടേഴ്സില്‍ ബനിയന്‍ ട്രീ ഫോറത്തില്‍ സംഘടിപ്പിച്ച വാര്‍ത്താസമ്മേളനത്തില്‍ സംഘാടകരായ ദുബൈ ഗവണ്‍മെന്റ് വിഭാഗമായ ദുബൈ ഫെസ്റ്റിവല്‍ ആന്‍ഡ് റീടെയില്‍ എസ്റ്റാബ്ലിഷ്മെന്റ് (ഡി.എഫ്.ആര്‍.ഇ), ദുബൈ ടൂറിസം എന്നിവരുടെ ഉദ്യോഗസ്ഥരാണ് പ്രഖ്യാപനം നടത്തിയത്. 

ഈ മാസം 28 മുതല്‍ സെപ്റ്റംബര്‍ 1 വരെ 65 ദിനങ്ങളിലായാണ് ഡി.എസ്.എസ് സംഘടിപ്പിക്കുക. ദുബൈ ഷോപ്പിങ് ഫെസ്റ്റിവലിന്റെ വേനല്‍ക്കാല ഉത്സവമായ ഡി.എസ്.എസിന്റെ 27-ാം പതിപ്പാണ് ഇത്തവണ സംഘടിപ്പിക്കുന്നത്.  ഇതുവരെ നടന്ന എഡിഷനുകളില്‍ ഏറ്റവും വലുതാണ് ഈ വര്‍ഷത്തേത്. താമസക്കാര്‍ക്കും സന്ദര്‍ശകര്‍ക്കും ആഘോഷിക്കാനാകുന്ന പരിപാടികളും പ്രമോഷനുകളുമാണ് ഈ സീസണില്‍ സംഘടിപ്പിക്കുന്നതെന്ന് ഡി.എഫ്.ആര്‍.ഇ സി.ഇ.ഒ അഹ്‌മദ് അല്‍ ഖാജ, റാഫ്ള്‍സ് ആന്‍ഡ് റീടെയില്‍ പ്രമോഷന്‍സ് ആന്‍ഡ് സ്ട്രാറ്റജിക് അലയന്‍സസ് അസിസ്റ്റന്റ് വൈസ് പ്രസിഡന്റ് അബ്ദുല്ല അല്‍ അമീരി എന്നിവര്‍ പറഞ്ഞു.

വിനോദ പരിപാടികള്‍, ആകര്‍ഷക സമ്മാനങ്ങള്‍, പാചകാനുഭവങ്ങള്‍, ഹോട്ടല്‍ പ്രമോഷനുകള്‍ എന്നിവ ഇക്കാലയളവില്‍ വാഗ്ദാനം ചെയ്യുന്നു. 
ദിവസേനയുള്ള സര്‍പ്രൈസുകള്‍, റാഫിളുകള്‍, എക്സ്‌ക്ലൂസിവ് റീടെയില്‍ ഓഫറുകള്‍, പാചക ഓഫറുകള്‍, പ്രമുഖ ഹോട്ടലുകളിലും ഐകണിക് ആകര്‍ഷണങ്ങളിലുമുടനീളം കുട്ടികള്‍ക്ക് സൗജന്യ പ്രവേശനം എന്നിവയാല്‍ ദുബൈ നഗരം അനന്തമായ വേനല്‍ക്കാല സാഹസികതകളാണ് ഈ സീസണില്‍ തുറക്കുക. 

ത്രില്ലിങ് സാഹസികത തേടുന്ന സുഹൃത്തുക്കള്‍, കുടുംബങ്ങള്‍, ദമ്പതികള്‍, ഒറ്റയ്ക്ക് യാത്ര ചെയ്യുന്നവര്‍ എന്നിവരുടെയെല്ലാം താല്‍പര്യങ്ങളെ ഡി.എസ്.എസ് 2024 നിറവേറ്റുമെന്ന് സംഘാടകര്‍ അവകാശപ്പെടുന്നു. 28ന് വെള്ളിയാഴ്ച ഇതിഹാസ കലാകാരന്മാരായ ജോര്‍ജ് വസൂഫും അല്‍ ഷാമിയും കൊക്കകോള അരീനയില്‍ നടത്തുന്ന സംഗീത കച്ചേരികളോടെയാണ് ഡി.എസ്.എസിന് തുടക്കം കുറിക്കുക. 29ന് റാപ്പിലെ പ്രഗല്‍ഭരായ എക്സിബിറ്റ്, ഡി12, ഒബീ ട്രൈസ് അരങ്ങേറ്റം.

എത്യോപ്യയിലെ ഏറ്റവും വലിയ പോപ് താരമായ ടെഡി ആഫ്രോ 30ന് ഡി.എസ്.എസ് വേദിയിലെത്തും. വളര്‍ന്നു വരുന്ന യുവ അറബ് സംഗീതജ്ഞര്‍, ഗെയിം സോണുകള്‍, ഡൈനിംഗ് അനുഭവങ്ങള്‍ എന്നിവയുടെ വന്‍ നിര ഇവിടെ കാണാനാകും. 'ബീറ്റ് ദി ഹീറ്റ്' കച്ചേരി പരമ്പര അതിന്റെ മൂന്നാം വര്‍ഷത്തേക്ക് മടങ്ങി വരികയാണ്. സിലാവി, മര്‍വാന്‍ മൂസ, സൗള്‍ജ, അബൂ അല്‍ അന്‍വര്‍, ബിഗ് സാം തുടങ്ങിയ കലാകാരന്മാരില്‍ നിന്നും സന്ദര്‍ശകര്‍ക്ക് മികവുറ്റ പ്രകടനങ്ങള്‍ പ്രതീക്ഷിക്കാമെന്നാണ് സംഘാടകരുടെ വാഗ്ദാനം.

ഡി.എസ്.എസ് വില്‍പന നഗരത്തിലുടനീളമുള്ള മുന്‍നിര ബ്രാന്‍ഡുകളില്‍ മികച്ച വില നേടാന്‍ അവസരം നല്‍കുന്നു. ജീവിത ശൈലി, ഫാഷന്‍, സൗന്ദര്യം, ഇലക്ട്രോണിക് ബ്രാന്‍ഡുകള്‍ എന്നിവയില്‍ സൂപര്‍ ഡീലുകളും പരിമിത കാലത്തേക്കുള്ള ഓഫറുകളും ആകര്‍ഷകമായ ഡിസ്‌കൗണ്ടുകളും ലഭിക്കുന്നതാണ്. 

വൈവിധ്യമാര്‍ന്ന അനുഭവങ്ങള്‍ പ്രദര്‍ശിപ്പിക്കുന്ന ഇവന്റുകളുടെ സമഗ്രമായ കലണ്ടറിനൊപ്പം, ഡി.എസ്.എസ് 2024 നഗരത്തിലുടനീളമുള്ള വിനോദവും ആവേശവും മികച്ച വിലയിലുള്ള ഷോപ്പിംഗും മുന്നോട്ടു വയ്ക്കുന്നു.  എല്ലാ ദിവസവും പുതിയ വിസ്മയങ്ങളുണ്ടാകുമെന്നതാണ് ഈ വര്‍ഷത്തെ ഡി.എസ്.എസിന്റെ പ്രധാന സവിശേഷത. കുട്ടികള്‍ക്കായുള്ള റൈഡുകളും ഗെയിമുകളും ഷോകളുമുള്ള മുദ്ഹിഷ് വേള്‍ഡിന്റെ 25-ാം വാര്‍ഷികം ആഘോഷിക്കുന്ന സീസണ്‍ കൂടിയാണിത്.