ന്യൂഡൽഹി: 18ാം ലോക്സഭയുടെ സ്പീക്കറായി ഓം ബിർലയെ തെരഞ്ഞെടുത്തു. ശബ്ദ വോട്ടോടെയായിരുന്നു പ്രമേയം പാസാക്കിയത്. ഓം ബിർലയെ സ്പീക്കറാക്കണമെന്ന പ്രമേയം പ്രധാനമന്ത്രി നരേന്ദ്ര മോദിയാണ് സഭയിൽ അവതരിപ്പിച്ചത്. കൊടിക്കുന്നിൽ സുരേഷിനെ പ്രതിപക്ഷ സ്ഥാനാർഥിയായി നിർത്തിയിരുന്നെങ്കിലും പ്രതിപക്ഷം ഡിവിഷൻ വോട്ട് - ബാലറ്റ് ഉപയോഗിച്ച് അല്ലെങ്കിൽ ഇലക്ട്രോണിക് സംവിധാനത്തിൽ രേഖപ്പെടുത്തുന്ന വോട്ട് - ആവശ്യപ്പെട്ടില്ല. 

എൻഡിഎയുടെ സ്ഥാനാർഥിയായ ഓം ബിർലയുടെ പേര് നിർദ്ദേശിച്ച് 13 പ്രമേയങ്ങൾ ആണ് എത്തിയത്. മാവേലിക്കര എംപിയായ കൊടിക്കുന്നിൽ സുരേഷിന്റെ പേരു നിർദ്ദേശിച്ച് 3 പ്രമേയങ്ങളുമെത്തി. ഓം ബിർലയുടെ പേര് നിർദ്ദേശിച്ചുള്ള ആദ്യ പ്രമേയം പ്രധാനമന്ത്രി നരേന്ദ്ര മോദിയുടേതായിരുന്നു. ഇതിനെ പ്രതിരോധ മന്ത്രി രാജ്നാഥ് സിങ് പിന്താങ്ങി.

സ്പീക്കറായി തിരഞ്ഞെടുക്കപ്പെട്ട ഓം ബിർലയെ പ്രധാനമന്ത്രി നരേന്ദ്ര മോദി, പ്രതിപക്ഷ നേതാവ് രാഹുൽ ഗാന്ധി, പാർലമെന്ററികാര്യ മന്ത്രി കിരൺ റിജിജു എന്നിവർ ചേർന്ന് ഇരിപ്പിടത്തിനടുത്തേക്ക് ആനയിച്ചു.

ഇത് രണ്ടാം തവണയാണ് ഓം ബിർള ലോക്‌സഭയുടെ സ്പീക്കർ ആകുന്നത്. കഴിഞ്ഞ സർക്കാരിന്റെ കാലത്തും അദ്ദേഹം തന്നെയായിരുന്നു സ്പീക്കർ. രാജസ്ഥാനിലെ കോട്ടിൽ നിന്നുള്ള പാർലമെന്റ് അംഗമാണ് ഓം ബിർള.