കോഴിക്കോട്: നീതിയിലധിഷ്ഠിതമായ ശരീഅത്തിന്റെ സംരക്ഷണത്തിന് വേണ്ടി സ്രഷ്ടാവ് എല്ലാ കാലത്തും സംവിധാനം ഏര്‍പ്പെടുത്തുമെന്നും അങ്ങനെ രൂപീകരിക്കപ്പെട്ട സംഘടനയാണ് സമസ്ത കേരള ജംഇയ്യത്തുല്‍ ഉലമ എന്നും സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പറഞ്ഞു. സമസ്ത സ്ഥാപകദിനത്തോടനുബന്ധിച്ച സംഘടിപ്പിച്ച നേതൃസംഗമത്തില്‍ ഉദ്‌ഘാടന പ്രസംഗം നടത്തുകയായിരുന്നു അദ്ദേഹം. 

സമുദായത്തിന്റെ വിശ്വാസവും കര്‍മവും തകര്‍ക്കാന്‍ പുത്തന്‍വാദികള്‍ രംഗത്ത് വന്നപ്പോളാണ് സമസ്ത രൂപീകരിച്ചത്. സമസ്ത മുസ്‌ലിം ഉമ്മത്തിന് ചെയ്ത ഏറ്റവും വിലയ സേവനം നബി(സ)യില്‍ നിന്ന് മനസ്സിലാക്കിയത് പോലെയുള്ള മതം പഠിപ്പിച്ചു എന്നതാണ്. അതിനുവേണ്ടി വിദ്യാഭ്യാസത്തിന് സമസ്ത മുന്‍തൂക്കം നല്‍കി. ഏത് വിദ്യാഭ്യാസമാണെങ്കിലും ധാര്‍മിക മൂല്യങ്ങളില്‍ അധിഷ്ഠിതമാകണം എന്നതാണ് സമസ്ത നിലപാട് - ജിഫ്‌രി തങ്ങൾ പറഞ്ഞു. 
 
ഈ രാജ്യത്തിന്റെ മത സൗഹാര്‍ദം, മനുഷ്യന്മാര്‍ക്കിടയില്‍ ഐക്യം സ്‌നേഹം സൗഹാര്‍ദം എന്നിവ നിലനിര്‍ത്താനും ജനാധിപത്യമൂല്യങ്ങള്‍ സംരക്ഷിക്കാനും സമസ്ത പ്രവര്‍ത്തിച്ചു. അത് കൊണ്ടാണ് എല്ലാ ജനങ്ങളും ഈ പ്രസ്ഥാനത്തെ ഇഷ്ടപ്പെട്ടത് എന്നും അദ്ദേഹം പറഞ്ഞു. മുന്‍ഗാമികള്‍ വളര്‍ത്തിയതുപോലെ ഈ പ്രസ്ഥാനത്തെ വളര്‍ത്താനും ആശയപ്രചാരണം നടത്താനും ജനങ്ങള്‍ മുന്നിട്ടിറങ്ങണം എന്നും ആഗതമാകുന്ന സുപ്രഭാതം പത്രത്തിന്റെ പ്രചാരണത്തില്‍ എല്ലാവരും സജീവമായി രംഗത്തിറങ്ങിണമെന്നും ജിഫ്‌രി തങ്ങള്‍ പറഞ്ഞു.

സമസ്ത സ്ഥാപക പ്രസിഡണ്ട് വരക്കല്‍ മുല്ലക്കോയ തങ്ങളും ദീര്‍ഘകാലം സമസ്തയെ നയിച്ച ശംസുല്‍ ഉലമ ഇ.കെ. അബൂബക്കര്‍ മുസ്‌ലിയാരും അന്ത്യവിശ്രമം കൊള്ളുന്ന പുതിയങ്ങാടി വരക്കല്‍ മഖാം സിയാറത്തോടെയാണ് നേതൃസംഗമ പരിപാടികൾക്ക് തുടക്കമായത്. സമസ്തയുടെയും പോഷക സംഘടനകളുടെയും സംസ്ഥാന കമ്മിറ്റി അംഗങ്ങളും ജില്ലാ കമ്മിറ്റി ഭാരവാഹികളും പ്രത്യേകം ക്ഷണിക്കപ്പെട്ട പ്രതിനിധകളുമാണ് കോഴിക്കോട് സമസ്ത അങ്കണത്തില്‍ വെച്ച് നടക്കുന്ന നേതൃസംഗമത്തിൽ പങ്കെടുക്കുന്നത്.

കോഴിക്കോട് ഫ്രാന്‍സിസ് റോഡിലെ സമസ്ത അങ്കണത്തില്‍ പ്രത്യേകം സജ്ജമാക്കിയ പന്തലില്‍ വെച്ച് നടക്കുന്ന നേതൃസംഗമം പതാക ഉയർത്തലോടെയാണ് തുടക്കമായത്. സമസ്ത കേരള ജംഇയ്യത്തുല്‍ ഉലമാ വൈ. പ്രസിഡണ്ട് എം.കെ. മൊയ്തീന്‍ കുട്ടി മുസ്‌ലിയാര്‍ പതാക ഉയര്‍ത്തി. സമസ്ത വൈ. പ്രസിഡണ്ട് എം.പി. കുഞ്ഞിമുഹമ്മദ് മുസ്‌ലിയാര്‍ നെല്ലായ പ്രാര്‍ത്ഥനക്ക് നേതൃത്വം നൽകി. പാണക്കാട് സയ്യിദ് സ്വാദിഖലി ശിഹാബ് തങ്ങള്‍ നേതൃസംഗമത്തിന് അധ്യക്ഷനായി. ജനറല്‍ സെക്രട്ടറി പ്രൊഫ.കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തി.

സമസ്ത ട്രഷറര്‍ പി.പി. ഉമ്മര്‍ മുസ്‌ലിയാര്‍ കൊയ്യോട്, എസ്.കെ.എസ്.എസ്.എഫ് പ്രസിഡണ്ട് പാണക്കാട് സയ്യിദ് ഹമീദലി ശിഹാബ് തങ്ങള്‍, സമസ്ത കേരള ജംഇയ്യത്തുല്‍ ഉലമാ വൈ. പ്രസിഡണ്ട് യു.എം. അബ്ദുറഹിമാന്‍ മുസ്‌ലിയാര്‍, സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രസിഡണ്ട് പി.കെ. മൂസക്കുട്ടി ഹസ്രത്ത്, കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, സമസ്ത സെക്രട്ടറി കെ. ഉമര്‍ ഫൈസി മുക്കം, സമസ്ത കേന്ദ്ര മുശാവറ അംഗങ്ങൾ, പോഷക സംഘടന നേതാക്കൾ തുടങ്ങിയവർ നേതൃസംഗമത്തിൽ സംബന്ധിക്കുന്നു.