സഊദി അറേബ്യയുടെ ആശങ്കയ്ക്ക് അറുതിവരുത്തിയിരിക്കുകയാണ് അവർ പുതുതായി കണ്ടെത്തിയ എണ്ണപ്പാടങ്ങൾ. പെട്രോളിയത്തിന്റെ ലഭ്യത കുറയുന്നുവെന്ന ആശങ്കകൾക്കിടയിലാണ് വമ്പൻ എണ്ണപ്പാടങ്ങൾ സഊദി കണ്ടെത്തിയത്. തൊഴിലവസര സാധ്യതകൾ ഉൾപ്പെടെ തുറന്നിടുന്ന ഈ എണ്ണപ്പാടങ്ങൾ സഊദിയുടെ സമ്പത്ത് വ്യവസ്ഥയ്ക്ക് തന്നെ മുതൽക്കൂട്ടാകും. റിഫൈനറികളിലെ ജോലികൾ, ലോജിസ്റ്റിക്സ് രംഗത്ത് വമ്പൻ അവസരങ്ങൾ, അനുബന്ധ കോൺട്രാക്ടിംഗ് ജോലികൾ തുടങ്ങി, ഹോട്ടൽ വ്യവസായത്തിൽ വരെ കൂടുതൽ തൊഴിലവസരങ്ങൾ ഇതുവഴി തുറക്കുമെന്നാണ് പ്രതീക്ഷിക്കുന്നത്.

സഊദി അറേബ്യയുടെ നിലവിലുള്ള എണ്ണ അടുത്ത രണ്ട് നൂറ്റാണ്ടിലെ ആഭ്യന്തര ഉപയോഗത്തിനുള്ളത് മാത്രമാണ്. എന്നാൽ രണ്ട് നൂറ്റാണ്ടിലെ ആഭ്യന്തര ഉപയോഗം മാത്രമല്ല എണ്ണ കൊണ്ട് സഊദിയ്ക്ക് ഉള്ള ആവശ്യം. എണ്ണ വിൽപ്പനയെ പ്രധാന കയറ്റുമതി വരുമാനമായി കാണുന്ന സഊദി അറേബ്യയ്ക്ക് രാജ്യത്തെ ആവശ്യത്തിനപ്പുറം ലോകത്തിലേക്കുള്ള കയറ്റുമതി കൂടി കണക്കിലെടുക്കേണ്ടതുണ്ട്. ഉത്പാദനത്തിന്റെ 59 ശതമാനവും കയറ്റുമതി ചെയ്യുന്നതിലൂടെയാണ് സഊദി രാജ്യത്തിന്റെ സാമ്പത്തിക ഭദ്രത ഉറപ്പിക്കുന്നത്. ഇത് കൂടി കണക്കിലെടുത്താൽ അടുത്ത 100 വർഷത്തേക്കുള്ള എണ്ണയായിരുന്നു സഊദിയ്ക്ക് സ്റ്റോക്ക് ഉണ്ടായിരുന്നത്.

എന്നാൽ എല്ലാ ആശങ്കകളെയും മാറ്റി നിർത്തുകയാണ്, കിഴക്കൻ പ്രവിശ്യയിലെ മരുഭൂമിയിൽ മാസങ്ങൾ നീണ്ട പര്യവേക്ഷണം വഴി കണ്ടെത്തിയ എണ്ണപ്പാടങ്ങൾ. ഭൂമിശാസ്ത്രപരമായി വിഖ്യാതമായ റുബുഉൽഖാലി (empty quarter oil fields) മരുഭൂമിയുടെ ഭാഗമാണ് ഈ പ്രദേശം. പുതിയ ഗവേഷണത്തിന്റെ ഫലങ്ങൾ തിങ്കളാഴ്ചയാണ് സൗദി ഗവൺമെന്റ് പുറത്ത് വിട്ടത്.

ഗവേഷണങ്ങളുടെ ഭാഗമായി ഏഴ് കൂറ്റൻ എണ്ണപ്പാടങ്ങളാണ് കണ്ടെത്തിയിരിക്കുന്നത്. കണ്ടെത്തിയ ഇടങ്ങളിൽ രണ്ടു സ്ഥലത്ത് പരമ്പരാഗത പെട്രോളിയം ഖനനത്തിനും മൂന്ന് സ്ഥലത്ത് ആധുനിക രീതിയിലുള്ള പ്രകൃതി വാതകം ഖനനത്തിനുമുള്ള തയ്യാറെടുപ്പാണ് നടക്കുന്നത്. ലോകത്ത് പ്രകൃതി വാതകം കൂടുതലായി ആവശ്യമായി വരുന്ന സാഹചര്യത്തിൽ കൂടിയാണ് സഊദിയുടെ ചുവടുവെപ്പ്.

 പെട്രോളിയം ഉത്പന്നങ്ങൾ ഉൽപ്പാദിപ്പിക്കുന്നതിൽ ലോകത്ത് രണ്ടാം സ്ഥാനത്താണ് സഊദി അറേബ്യ. പ്രതിദിനം ഒന്നേകാൽ കോടി ബാരലാണ് സഊദിയുടെ ഉത്പാദനം.