മട്ടാഞ്ചേരി: ബാലവേല എന്ന സംശയത്തെ തുടര്‍ന്ന നടന്ന പരിശോധനയില്‍ തോപ്പുംപടിയിലെ മത്സ്യ സംസ്‌ക്കരണ ശാലയില്‍ നിന്നും കണ്ടെത്തിയ പ്രായപൂര്‍ത്തിയാകാത്ത ഒഡീഷ സ്വദേശികളായ പെണ്‍കുട്ടികളെ ഇന്ന് നാട്ടിലേക്ക് അയക്കും.
മുഴുവന്‍ പേരുടെയും പരിശോധന നടന്നതിനെ തുടര്‍ന്ന് 13 ഒഡീഷ സ്വദേശികളും 13 ആന്ധ്ര സ്വദേശികളും പ്രായ പുര്‍ത്തി എത്താത്തവരാണെന്ന് കണ്ടെത്തിയിരിന്നു. ഇതില്‍ ഒഡിഷ സ്വദേശികളെയാണ് നാട്ടിലേക്ക് അയക്കുന്നത്. ഒഡിഷയില്‍ നിന്ന് വന്നിട്ടുള്ള ലീഗല്‍ അഡ്വൈസറുടെയും രണ്ട് പോലിസ് കാരുടെയും കൂടെയാണ് ഇവരെ പറഞ്ഞ് അയക്കുന്നത്. പ്രായപൂര്‍ത്തി എത്താത്ത ആന്ധ്ര സ്വദേശികളുടെ കാര്യത്തില്‍ തീരുമാനമായിട്ടില്ല.
ചൈല്‍ഡ് ലൈന്‍ പ്രവര്‍ത്തകര്‍ ആന്ധ്രാ അധികൃതരുമായി ബന്ധപ്പെട്ടിട്ടുണ്ടെങ്കിലും ഇത് വരെ മറുപടികളൊന്നും ലഭിച്ചിട്ടില്ല. എന്നാല്‍ പ്രായ പുര്‍ത്തിയാകാത്തവരെ ഇവിടെ താമസിപ്പിക്കാന്‍ കഴിയില്ലെന്ന കാരണത്താല്‍ അവിടെ നിന്നും മറുപടി വരാന്‍ ഇനിയും താമസിച്ചാല്‍ ഇവിടത്തെ പ്രതിനിധികളുടെ കൂടെ ഇവരെ ആന്ധ്രയിലേക്ക് അയക്കും.
പ്രായ പുര്‍ത്തിയായവര്‍ മത്സ്വ സംസ്‌ക്കരണ ശാലയില്‍ തൊഴിലെടുക്കുന്നതിന് തൊഴില്‍ വകുപ്പിന്റെ അനുമതിയുണ്ടാകും. മാന്യമായ കൂലി നല്‍കണമെന്ന നിര്‍ദേശം കമ്പനിക്ക് നല്‍കും.
അതേ സമയം പ്രായപുര്‍ത്തി എത്താത്തവരെ ലൈംഗികമായി പീഡിപ്പിച്ചിട്ടുണ്ടോ എന്ന പരിശോധന നടത്തി. ഇതിന്റെ ഫലം രണ്ട് ദിവസങ്ങള്‍ക്ക് ശേഷമെ ലഭിക്കു.