ലഖ്‌നോ: തെരഞ്ഞെടുപ്പ് വിജയം സമ്മാനിച്ച റായ്ബറേലിക്ക് നന്ദി അറിയിക്കാനെത്തി ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി. ബച്‌റാവാനിലെ ചുരുവ ഹനുമാന്‍ ക്ഷേത്രത്തിലെത്തി പ്രാര്‍ഥന നടത്തിയായിരുന്നു തുടക്കം. ലോക്‌സഭയില്‍ പ്രതിപക്ഷ നേതാവായി നിയമിതനായ ശേഷമുള്ള രാഹുലിന്റെ ആദ്യ റായ്ബറേലി സന്ദര്‍ശനമാണ് ഇത്.

 ലോക്‌സഭ തെരഞ്ഞെടുപ്പില്‍ മികച്ച വിജയം സമ്മാനിച്ചതിന്റെ സന്തോഷവും നന്ദിയും അറിയിക്കാന്‍ രാഹുല്‍ ഗാന്ധി മണ്ഡലത്തിലെത്തി ജനങ്ങളെ കാണും. പാര്‍ട്ടി പ്രവര്‍ത്തകരുമായും രാഹുല്‍ കൂടിക്കാഴ്ച നടത്തുമെന്നും കോണ്‍ഗ്രസ് ജില്ലാ അധ്യക്ഷന്‍ പങ്കജ് തിവാരി പറഞ്ഞു. കൂടാതെ 2023ല്‍ സിയാച്ചിനില്‍ കൊല്ലപ്പെട്ട ക്യാപ്റ്റന്‍ അന്‍ഷുമാന്‍ സിങ്ങിന്റെ കുടുംബത്തേയും രാഹുല്‍ സന്ദര്‍ശിക്കും. 

3.90ലക്ഷം വോട്ടിന്റെ ഭൂരിപക്ഷത്തിലാണ് രാഹുല്‍ ഗാന്ധി റായ്ബറേലി മണ്ഡലത്തില്‍ നിന്നും വിജയിച്ചത്. വിജയത്തിന് പിന്നാലെ രാഹുല്‍ ഗാന്ധി കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധിക്കൊപ്പം പാര്‍ട്ടി പ്രവര്‍ത്തകരുമായി കൂടിക്കാഴ്ച നടത്തിയിരുന്നു.

കഴിഞ്ഞ മാസം മികച്ച ഭൂരിപക്ഷത്തില്‍ വിജയിച്ച വയനാട് മണ്ഡലത്തില്‍ നിന്നും രാജിവെച്ച് രാഹുല്‍ റായ്ബറേലിയെ നിലനിര്‍ത്തുകയായിരുന്നു. വയനാട് ഉപതെരഞ്ഞെടുപ്പില്‍ മത്സരിച്ച് പ്രിയങ്ക ഗാന്ധി തെരഞ്ഞെടുപ്പില്‍ അരങ്ങേറ്റം കുറിച്ചേക്കും.