ഗൂഡല്ലൂര്‍: തമിഴ്‌നാട്ടില്‍ ആരാധനാലയങ്ങളില്‍ ഉച്ചഭാഷിണി ഉപയോഗിക്കുന്നതിന് ചെന്നൈ ഹൈക്കോടതിയുടെ വിലക്ക്. പകരം സ്പീക്കര്‍ ബോക്‌സ് ഉപയോഗിക്കാനാണ് നിര്‍ദേശം. ക്ഷേത്രങ്ങള്‍, മുസ്‌ലിം, ക്രിസ്ത്യന്‍ പള്ളികള്‍ തുടങ്ങിയ ആരാധനാലയങ്ങളിലെ ഉച്ചഭാഷിണി ഉപയോഗത്തിനാണ് ഹൈക്കോടതി വിലക്കേര്‍പ്പെടുത്തിയിരിക്കുന്നത്.
സ്വകാര്യ വ്യക്തി നല്‍കിയ ഹരജി സ്വീകരിച്ചാണ് കോടതി ഉത്തരവ് പുറപ്പെടുവിച്ചത്. ഉത്തരവ് നടപ്പാക്കാന്‍ പൊലിസിന് നിര്‍ദേശം നല്‍കിയിട്ടുണ്ട്. നീലഗിരി ജില്ലയിലെ കൂനൂര്‍ മേഖലയില്‍ സി.ഐ ലക്ഷ്മണദാസ്, എസ്.ഐ പത്മ എന്നിവര്‍ താലൂക്കിലെ ആരാധനാലയങ്ങളിലെ ഉച്ചഭാഷിണികള്‍ എടുത്ത് മാറ്റാന്‍ നിര്‍ദേശിച്ചിട്ടുണ്ട്. ഗൂഡല്ലൂര്‍-പന്തല്ലൂര്‍ താലൂക്കുകളിലും ആരാധനാലയങ്ങളില്‍ പൊലിസ് പ്രസ്തുത വിവരം കൈമാറിയിട്ടുണ്ട്. സെപ്റ്റംബര്‍ ഒന്‍പതിന് മുന്‍പ് ഉച്ചഭാഷിണി നീക്കം ചെയ്യാനാണ് നിര്‍ദേശം. സെപ്റ്റംബര്‍ ഒന്‍പതിനകം ഉച്ചഭാഷിണി നീക്കം ചെയ്തിട്ടില്ലെങ്കില്‍ അവ പിടിച്ചെടുത്ത് കേസെടുക്കുമെന്നും ഉന്നത പൊലിസ് വൃത്തങ്ങള്‍ അറിയിച്ചു.