കൊച്ചി: സംസ്ഥാനത്തെ പാരലൽകോളജുകളുടെ പ്രവർത്തനം ഒരു കുടക്കീഴിൽ കൊണ്ടുവരാൻ നടപടികളാരംഭിച്ചതായി  ശ്രീ നാരായണ ഗുരു ഓപ്പൺ യൂനിവേഴ്സിറ്റി വൈസ് ചാൻസലർ പ്രൊഫ. ഡോ. വി.പി ജഗതി രാജ്. ഇതിനായുള്ള പ്രാരംഭചർച്ചകൾ ആരംഭിച്ചിട്ടുണ്ട്. ശ്രീനാരായണ ഗുരു   ഓപ്പൺ യൂനിവേഴ്സിറ്റിയുടെ സെന്ററുകൾ കേന്ദ്രീകരിച്ച് പ്രവർത്തനം ഏകോപിപ്പിക്കാനാണ് ലക്ഷ്യമിടുന്നതെന്നും യൂനിവേഴ്സിറ്റി എറണാകുളം റീജ്യനൽ സെന്ററിന്റെ ഉദ്‌ഘാടനത്തോടനുബന്ധിച്ച് നടത്തിയ വാർത്താ സമ്മേളനത്തിൽ അദ്ദേഹം വ്യക്തമാക്കി. 

 എറണാകുളം റീജ്യനൽ സെന്ററിന്റെ ഉദ്‌ഘാടനം 22 ന് തൃപ്പൂണിത്തുറ ഗവ.കോളജി മന്ത്രി പി.രാജീവ് നിർവഹിക്കും. ഹൈബി ഈഡൻ  എം.പി  മുഖ്യാതിഥിയാകും.  നിലവിൽ 20,000 പഠിതാക്കളാണ് യൂനിവേഴ്സിറ്റിയിൽ വിവിധ കോഴ്സുകളിൽ ചേർന്നിരിക്കുന്നത്. ഈ വർഷം 50,000 പഠിതാക്കളെയാണ് പ്രതീക്ഷിക്കുന്നത്.

യു.ജി, പി.ജി പ്രോഗ്രാമുകൾക്ക് പുറമെ തൊഴിലധിഷ്ഠിത പ്രോഗ്രാമുകൾക്കും ഈ അധ്യയന വർഷം തുടക്കം കുറിക്കുമെന്നും വൈസ് ചാൻസലർ പറഞ്ഞു. 
വാർത്താസമ്മേളനത്തിൽ പ്രോ വൈസ് ചാൻസലർ ഡോ.എസ് .വി സുധീർ, സിൻഡിക്കേറ്റ് അംഗങ്ങളായ  അഡ്വ. ബിജു കെ.മാത്യു, ഡോ. റെനി സെബാസ്റ്റ്യൻ, അനുശ്രീ കെ, ഡോ. ഡിംപി വി .ദിവാകരൻ എന്നിവരും പങ്കെടുത്തു.

Integration of Parallel Colleges Under a Unified Authority Planned