കോഴിക്കോട്: കേരള ഹയർ സെക്കൻഡറി വിദ്യാഭ്യാസം കുട്ടികളെ മാർക്ക് നൽകി തോൽപ്പിക്കുകയാണെന്ന് കീം പരീക്ഷാ ഫലം വ്യക്തമാക്കുന്നു. കീം പരീക്ഷ എഴുതിയവരിൽ 70 ശതമാനം കേരള സിലബസുകാരായിട്ടും ആദ്യത്തെ 5,000 റാങ്കിലെത്തിയവരിൽ 40 ശതമാനം മാത്രമാണ് കേരളക്കാർ. ഫുൾ എപ്ലസുകാരുടെ എണ്ണവുമായി കീം ഫലം ഒട്ടും യോജിക്കുന്നില്ല. പരീക്ഷാ സ്‌കോർ ചേർക്കുമ്പോൾ നോർമലൈസേഷന്റെ പേരിൽ വീണ്ടും തോൽപ്പിക്കുന്നു. 

2024ലെ കീം പരീക്ഷയ്ക്ക് ഹാജരായ 79,044 പേരിൽ 58,340 പേരാണ് റാങ്ക് പട്ടികയിൽ ഇടം പിടിച്ചത്. 73.81 ശതമാനം പേർ എൻജിനീയറിങ്ങിന് ചേരാൻ യോഗ്യത നേടിയിട്ടുണ്ട്. പ്രവേശന പരീക്ഷയുടെ സ്‌കോറും യോഗ്യതാ പരീക്ഷയുടെ സ്‌കോറും ചേർത്താണ് കീം റാങ്ക് പട്ടിക തയാറാക്കുന്നത്. യോഗ്യതാ പരീക്ഷയുടെ സ്‌കോർ ചേർത്ത് ഇത്തവണ സി.ബി.എസ്.ഇ അടക്കം മറ്റു പരീക്ഷകളുമായി താരതമ്യപ്പെടുത്തിയപ്പോൾ 27 സ്‌കോറാണ് കേരള സിലബസുകാർക്ക് നഷ്ടമായത്. ഇതോടെ റാങ്ക് പട്ടികയിൽ കേരളക്കാർ കുത്തനെ പിറകോട്ടുപോയി. കേരള സിലബസിൽ പരീക്ഷ എഴുതുന്നവരിൽ കൂടുതൽ പേർക്ക് ഉയർന്ന സ്‌കോർ ലഭിക്കുന്നത് എൻട്രൻസിന്റെ റാങ്കിന് പരിഗണിക്കുമ്പോൾ പാരയാവുകയാണ്. 

ഇത്തവണ കീം എഴുതിയവരിൽ 36,390 പേർ കേരള സിലബസുകാരായിരുന്നു. അഥവാ 69.31 ശതമാനം. റാങ്ക് പട്ടികയിൽ ആദ്യത്തെ 5,000 പേരിൽ ഇതിൽനിന്ന് ഉൾപ്പെട്ടത് 2,034 പേർ മാത്രം. അതേസമയം, 14,541 പേർ മാത്രം (27.7 ശതമാനം) എഴുതിയ സി.ബി.എസ്.ഇക്കാരിൽ 2,785 പേർ 5,000ത്തിൽ വന്നു. ഇത് 55.70 ശതമാനം. ഐ.സി.എസ്.ഇക്കാർ പരീക്ഷ എഴുതിയത് 1079 പേരാണ്. ഇതിൽ 162 പേരും 5,000ത്തിൽ വന്നു.

ഈ വർഷം പ്ലസ്ടുവിന് ഏറ്റവും കൂടുതൽ ഫുൾ എപ്ലസുകാരുണ്ടായിരുന്നത് മലപ്പുറം ജില്ലയിലാണ്-11,974. ഇവിടെ നിന്ന് കീം എൻജിനീയറിങ് റാങ്ക് പട്ടികയിൽ ഇടംപിടിച്ചത് 5,094 പേരാണ്. ആദ്യത്തെ 1,000 പേരിൽ ഉൾപ്പെട്ടത് വെറും 79 പേരും. കീം 6,000 റാങ്കിൽ ഏറ്റവും കൂടുതൽ പേർ വന്നത് എറണാകുളം ജില്ലയിൽ നിന്നാണ്- 170 പേര്. 6,568 പേർ എറണാകുളം ജില്ലിയിൽനിന്ന് റാങ്ക് പട്ടികയിൽ വന്നു. 125 പേരെ 1,000 റാങ്കിലെത്തിച്ച  തിരുവനന്തപുരം ജില്ലയിൽ ഫുൾ എപ്ലസുകാർ 6,030 ആണ്. 7,146 ഫുൾ എ പ്ലസുണ്ടായ കൊല്ലം ജില്ലയിൽനിന്ന് 6,000 പേരിൽ വന്നത് 53 പേർ മാത്രം. 1,000 റാങ്കിൽ വന്നവർ: തൃശൂർ-108, കോട്ടയം -99, കോഴിക്കോട്- 93, പത്തനംതിട്ട- 23, ആലപ്പുഴ-53, ഇടുക്കി- 10, പാലക്കാട്- 55, വയനാട് 11, കണ്ണൂർ 75, കാസകോട് 21, മറ്റുള്ളവ 24.

സംസ്ഥാന ഹയർ സെക്കൻഡറി പരീക്ഷയിൽ 78.69 ശതമാനം വിജയിച്ചപ്പോൾ കീമിൽ യോഗ്യത നേടിയത് 73.81 ശതമാനം പേരാണ്. കീമിൽ യോഗ്യത നേടാൻ 300ൽ 10 മാർക്ക് അഥവാ 3.33 ശതമാനം നേടിയാൽ മതി. ഹയർ സെക്കൻഡറി കടക്കാൻ എഴുത്തു പരീക്ഷയ്ക്കു തന്നെ 30 ശതമാനം സ്‌കോർ വേണം.