തൃശൂര്‍: സപ്ലൈകോയുടെ ജില്ലയിലെ ഓണം- ബക്രീദ് ഫെയര്‍ നാളെ മുതല്‍ 13 വരെ തൃശൂര്‍ ശക്തന്‍ നഗര്‍ കൊക്കാല ഗ്രൗണ്ടില്‍ നടക്കും. ഫെയറിന്റെ ഉദ്ഘാടനം വിദ്യാഭ്യാസ മന്ത്രി പ്രൊഫ. സി.രവീന്ദ്രനാഥ് നിര്‍വഹിക്കും. കോര്‍പ്പറേഷന്‍ മേയര്‍ അജിത ജയരാജന്‍ അധ്യക്ഷയാകും. ജില്ലയില്‍ ആറു താലൂക്കുകളിലായി സെപ്റ്റംബര്‍ അഞ്ചു മുതല്‍ 13 വരെ ഫെയര്‍ നടക്കും. കൂടാതെ ആറ് ഓണച്ചന്തകള്‍ സെപ്റ്റംബര്‍ ഒമ്പതു മുതല്‍ 13 വരെയാണ് നടക്കുക. എല്ലാ സപ്ലൈകോ വില്‍പന ശാലകളും സെപ്റ്റംബര്‍ ഒമ്പതു മുതല്‍ 13 വരെ ഓണം മിനി ഫെയറുകളായി തുടരും. ഓണത്തോടനുബന്ധിച്ച് സപ്ലൈകോയുടെ പ്രത്യേക സമ്മാന പദ്ധതിയുമുണ്ട്. 300 രൂപയുടെ ശബരി ഉല്‍പ്പന്നങ്ങളടക്കം 2000 രൂപയ്ക്ക് നിത്യോപയോഗ സാധനങ്ങള്‍ വാങ്ങുന്ന ഉപഭോക്താക്കള്‍ക്ക് സപ്ലൈകോ ഗിഫ്റ്റ് കൂപ്പണ്‍ നല്‍കും. 2000 രൂപയ്ക്ക് മുകളിലുളള ഓരോ 1000 രൂപയ്ക്കും ഒരോ ഗിഫ്റ്റ് കൂപ്പണ്‍ അധികമായും നല്‍കും. കൂപ്പണ്‍ നറുക്കെടുപ്പ് വിജയിക്ക് അഞ്ച് പവന്‍ സ്വര്‍ണ നാണയം ലഭിക്കും.