കൊച്ചി: സംസ്ഥാനത്ത് സ്വര്‍ണവില കുതിച്ചുകയറി. ഒറ്റയടിക്ക് 720 രൂപയാണ് ഇന്ന് വർധിച്ചത്. ഇതോടെ ഒരിടവേളയ്ക്ക് ശേഷം സ്വർണവില 55,000 എത്തി. ഗ്രാമിന് 90 രൂപ വർധിച്ചു. 6875 രൂപയാണ് ഒരു ഗ്രാം സ്വര്‍ണത്തിന്റെ വില.

ഈ മാസത്തെ ഏറ്റവും ഉയര്‍ന്ന നിലവാരത്തിലാണ് സ്വർണവില ഇന്ന് എത്തിയത്. 55000 രൂപയാണ് ഒരു പവന്‍ സ്വര്‍ണത്തിന്റെ വില. ഈ മാസത്തിന്റെ ആദ്യത്തിൽ 53000 രൂപയായിരുന്നു സ്വര്‍ണവില. 16 ദിവസത്തിനിടെ 2000 രൂപയാണ് വർധനവുണ്ടായത്. മെയ് മാസം 20 ന്  55,120 രൂപയായി എത്തിയതാണ് സ്വര്ണവിലയിലെ സർവകാല റെക്കോർഡ്.

പ്രതീക്ഷിച്ചതിനേക്കാൾ നേരത്തെ അമേരിക്കൻ ഫെഡറൽ റിസർവ് പലിശ നിരക്ക് കുറച്ചേക്കും എന്ന സൂചനകളെ തുടർന്നാണ് ഇപ്പോഴത്തെ സ്വർണവിലയിലെ  കുതിപ്പ്. പലിശനിരക്ക് കുറക്കുന്നതോടെ അമേരിക്കൻ കടപ്പത്രങ്ങൾ അനാകർഷകമാവുകയും നിക്ഷേപകർ വീണ്ടും സ്വർണത്തിലേക്ക് തിരിയുകയും ചെയ്യുന്നതാണ് സ്വർണവില കുതിക്കാൻ കാരണം. വിവാഹ സീസണും മറ്റുമായിരിക്കെ സ്വർണവിലയിലെ കുതിപ്പ് സാധാരണക്കാർക്ക് തിരിച്ചടിയായി മാറുകയും ചെയ്യുന്നുണ്ട്.