ന്യൂഡല്‍ഹി: ഡല്‍ഹിയില്‍ നിന്നും യു.എസിലെ സാന്‍ഫ്രാന്‍സിസ്‌കോയിലേക്ക് യാത്ര തിരിച്ച എയര്‍ ഇന്ത്യ വിമാനം റഷ്യയിലേക്ക് വഴിതിരിച്ചു വിട്ടു. എയര്‍ ഇന്ത്യയുടെ എ.ഐ 183ാം നമ്പര്‍ വിമാനമാണ് വഴി തിരിച്ചു വിട്ടത്. വിമാനം റഷ്യയിലെ ക്രാസ്‌നോയാര്‍സ്‌കില്‍ അടിയന്തര ലാന്‍ഡിങ് നടത്തിയെന്ന് കമ്പനി അറിയിച്ചു.

സാങ്കേതിക തകരാര്‍ മൂലമാണ് വിമാനം വഴിതിരിച്ച് വിട്ടതെന്നാണ് എയര്‍ ഇന്ത്യ നല്‍കുന്ന വിശദീകരണം. കാര്‍ഗോ ഏരിയയില്‍ പ്രശ്‌നം കണ്ടെത്തിയതിനെ തുടര്‍ന്നാണ് ലാന്‍ഡിങ്ങെന്ന് കമ്പനി അറിയിച്ചു.  വിമാനത്തില്‍ 225 യാത്രക്കാരും 19 ജീവനക്കാരുമാണ് ഉണ്ടായിരുന്നത്. എല്ലാവരേയും വിമാനത്താവളത്തിലെ ടെര്‍മിനല്‍ ബില്‍ഡിങ്ങിലേക്ക് മാറ്റിയെന്നും എയര്‍ ഇന്ത്യ വ്യക്തമാക്കി.

യാത്രക്കാര്‍ക്ക് അവശ്യ സൗകര്യങ്ങള്‍ ഒരുക്കാന്‍ മറ്റൊരു കമ്പനിയെ നിയോഗിച്ചിട്ടുണ്ട്. എയര്‍ ഇന്ത്യക്ക് വിമാനത്താവളത്തില്‍ സൗകര്യങ്ങള്‍ ഇല്ലാത്തതിനാലാണ് ഇങ്ങനെ ചെയ്തതെന്നും കമ്പനി വിശദീകരിച്ചു. വിമാനത്താവള അധികൃതരുമായും സര്‍ക്കാറുമായും ചര്‍ച്ചകള്‍ തുടരുകയാണ്. യാത്രക്കാര്‍ക്ക് സാന്‍ഫ്രാന്‍സിസ്‌കോയിലേക്ക് പോകുന്നതിനായി എത്രയും പെട്ടെന്ന് പകരം വിമാനം ഏര്‍പ്പെടുത്തുമെന്നും കമ്പനി അറിയിച്ചു.

കഴിഞ്ഞ വര്‍ഷവും ഇതേ റൂട്ടില്‍ എയര്‍ ഇന്ത്യക്ക് വിമാനം വഴിതിരിച്ച് വിടേണ്ടി വന്നിരുന്നു. സാ?ങ്കേതിക തകരാര്‍ മൂലം റഷ്യന്‍ നഗരമായ മാഗാദനിലേക്കാണ് സാന്‍ഫ്രാന്‍സിസ്‌കോയിലേക്കുള്ള വിമാനം വഴിതിരിച്ച് വിട്ടത്. അന്ന് 216 യാത്രക്കാരും 16 ജീവനക്കാരുമാണ് വിമാനത്തിലുണ്ടായിരുന്നത്. പിന്നീട് ഇവരെ മറ്റൊരു വിമാനത്തിലാണ് സാന്‍ഫ്രാന്‍സിസ്‌കോയില്‍ എത്തിച്ചത്.