തിരുവനന്തപുരം: ഗൂഗിൾ അക്കൗണ്ട് ഹാക്ക് ചെയ്യപ്പെടാൻ സാധ്യതയുണ്ടെന്നും ജാഗ്രത വേണമെന്നും കേരള പൊലിസ്. മൊബൈൽ ഫോൺ നമ്പർ തന്നെ പാസ് വേർഡായി ഒരിക്കലും ഉപയോഗിക്കരുത്. പാസ്‌വേര്‍ഡ് അക്ഷരങ്ങളും, സ്പെഷൽ ക്യാരക്ടറുകളും അക്കങ്ങളും ഉൾപ്പെടുത്തിയുള്ളവയായിരിക്കണം. കുറഞ്ഞത് എട്ട് ക്യാരക്ടറുകളെങ്കിലും വേണം. വിശ്വസനീയമായ ഡിവൈസുകളിൽ മാത്രം അക്കൗണ്ട് ലോഗിന്‍ ചെയ്യുക. വിശ്വസനീയമല്ലാത്ത തേര്‍ഡ് പാര്‍ട്ടി ആപ്പുകൾക്ക് അക്കൗണ്ട് ആക്സസസ് കൊടുക്കരുത്.

ഗൂഗിൾ അക്കൗണ്ടുകളുടെ ടു സ്റ്റെപ് വെരിഫിക്കേഷൻ നിർബന്ധമായും ആക്ടിവേറ്റ് ചെയ്ത് സുരക്ഷിതമാക്കണം. ഹാക്ക് ചെയ്യപ്പെട്ടാൽ ഇമെയിൽ സേവനദാതാവിൽ നിന്ന് അലർട്ട് മെസേജ് വന്നതായി കാണാം. അതിൽ പറയുന്ന കാര്യങ്ങൾ ശ്രദ്ധിക്കുകയും നടപടി സ്വീകരിക്കുകയും വേണമെന്നും പൊലിസ് അറിയിച്ചു.