കോഴിക്കോട്: ആലപ്പുഴ - കണ്ണൂർ എക്സിക്യൂട്ടീവ് എക്സ്പ്രസ്സ് ട്രെയിനിൽ യാത്രക്കാരന് കുത്തേറ്റു. മദ്യലഹരിയിലായിരുന്ന ആളാണ് കുത്തിയത്. ഇയാളെ പിന്നീട് ആർ.പി.എഫ് കസ്റ്റഡിയിലെടുത്തു. കുത്തേറ്റയാളുടെ പരുക്ക് സാരമുള്ളതല്ല. ഇന്നലെ രാത്രി പതിനൊന്നരക്കും പന്ത്രണ്ടിനുമിടയിലാണ് സംഭവം ഉണ്ടായത്.

ആലപ്പുഴയിൽ നിന്ന് കണ്ണൂരിലേക്ക് പോകുന്ന എക്സിക്യൂട്ടീവ് എക്സ്പ്രസ്സ് പയ്യോളിക്കും വടകരക്കുമിടയിൽ ഉള്ള സമയത്താണ് സംഭവം ഉണ്ടായത്. കോച്ചിനുള്ളിൽ സ്ത്രീകളെ ശല്യം ചെയ്തത് കുത്തേറ്റ യാത്രക്കാരൻ ചോദ്യം ചെയ്തിരുന്നു. ഇതാണ് പ്രതിയെ പ്രകോപിപ്പിച്ചത്. സ്ക്രൂ ഡൈവർ ഉപയോഗിച്ചാണ് കുത്തിയത്. അക്രമി മദ്യ ലഹരിയിലായിരുന്നുവെന്ന് യാത്രക്കാർ അറിയിച്ചു. പരുക്ക് സാരമല്ലാത്തതിനാൽ കുത്തേറ്റ യാത്രക്കാരൻ പ്രാഥമിക ചികിത്സയ്ക്ക് ശേഷം കണ്ണൂരിലേക്ക് യാത്ര തുടർന്നു.