കൊച്ചി : കേരള ബ്ലാസ്റ്റേഴ്‌സ് എഫ്‌സിയുടെ ഗ്രാസ് റൂട്ട് പാര്‍ട്ണര്‍മാരായ പ്രൊഡിജി സ്‌പോര്‍ട്‌സിന്റെ ഭാഗമായ പ്രൊഡിജി ഫുട്‌ബോള്‍ അക്കാദമിയുടെ പ്രവര്‍ത്തനം കൂടുതല്‍ നഗരങ്ങളിലേക്ക് വ്യാപിപ്പിക്കും. പ്രൊഡിജി ഫുട്‌ബോള്‍ അക്കാദമിയുടെ ഒന്നാം വാര്‍ഷികത്തോടനുബന്ധിച്ച്, മുന്‍ കേരളാ ബ്ലാസ്റ്റേഴ്‌സ് കോച്ചും ഗ്രാസ് റൂട്ട് ടെക്‌നിക്കല്‍ ഡയറക്ടറുമായ ടെറി ഫെലന്‍ പ്രൊഡിജി ഫുട്‌ബോള്‍ അക്കാദമിയുടെ ടെക്‌നിക്കല്‍ ഡയറക്ടറും മുഖ്യ പരിശീലകനുമായി ചുമതലയേറ്റു. പ്രൊഡിജി ഫുട്‌ബോള്‍ അക്കാദമിക്ക് കേരളത്തില്‍ കൊച്ചി, മലപ്പുറം, തൃശൂര്‍, കോഴിക്കോട്, തിരുവനന്തപുരം എന്നിവിടങ്ങളിലായി അഞ്ച് അക്കാദമികളാണുള്ളത്. അടുത്തു നടക്കുന്ന കെ.എഫ്.എ അക്കാദമി ലീഗില്‍ പ്രോഡിജി 18 ടീമുകളെ പങ്കെടുപ്പിക്കും.

അഞ്ച് സെന്ററുകളിലായി 700ഓളം കുട്ടികളാണ് ഉള്ളത്. അണ്ടര്‍ 10, 12, 14, 15 വിഭാഗങ്ങളില്‍ 18 ടീമുകളിലായി പ്രൊഡിജിയുടെ 400 കുട്ടികളാണ് കെ.എഫ്.എയുടെ അക്കാദമി ലീഗില്‍ പങ്കെടുക്കുകയെന്ന് പ്രൊഡിജി ഫുട്‌ബോള്‍ അക്കാദമി മാര്‍ക്കറ്റിങ് ആന്‍ഡ് ഓപറേഷനല്‍ ഹെഡ്ഡ് നിഷാന്ത് നായര്‍ പറഞ്ഞു. സംസ്ഥാനത്തെ ഗ്രാസ് റൂട്ട് ഫുട്‌ബോളിന്റെ സമഗ്ര വികസനത്തിന് കെ.എഫ്.എയുടെ പൂര്‍ണ പിന്തുണയോടെ ദീര്‍ഘകാല അടിസ്ഥാനത്തിലുള്ള പദ്ധതികള്‍ക്ക് രൂപം കൊടുത്തിട്ടുണ്ടെന്നും നിഷാന്ത് നായര്‍ അറിയിച്ചു.