ഏകദേശം എല്ലാ വീടുകളിലും കറിവേപ്പില മരം ഉണ്ടാകാറുണ്ട്. എല്ലാവര്‍ക്കും നമ്മുടെ വീട്ടില്‍ ഒരു കറിവേപ്പ് മരം വേണമെന്ന് നിര്‍ബന്ധമുള്ളവരാണ്. മായമൊന്നുമില്ലാതെ ശുദ്ധമായ കറിവേപ്പില കറികളിലും മറ്റുമൊക്കെ നമുക്ക് ഉപയോഗിക്കാമല്ലോ.

കറികള്‍ക്ക് നല്ല രുചിയും മണവും നല്‍കുന്നതിനൊപ്പം ആരോഗ്യത്തിനും മുടിക്കും ഇത് നല്ലതാണ്. പക്ഷെ ഇലകളില്‍ പുഴുകയറി നശിച്ചു പോകുന്നത് സ്ഥിരം കാഴ്ചയാണ്. ഇതിന് എന്തൊക്കെ ചെയ്യാമെന്നു നോക്കാം. 

കഞ്ഞിവെള്ളം

കറിവേപ്പില മരം നന്നായി വളരാന്‍ കഞ്ഞി വെള്ളം ഒഴിച്ചു കൊടുക്കുന്നത് നല്ലതാണ്. കറിവേപ്പില ഇലകളായി നുള്ളിയെടുക്കാതെ മുകളില്‍ നിന്ന് മുറിച്ച് എടുക്കുന്നതാണ് നല്ലത്. ഇത് എളുപ്പത്തില്‍ മരം വളരാന്‍ സഹായിക്കുകയും ചെയ്യും. വളത്തിനായി ചായപ്പൊടിയുടെ ചണ്ടിയും മുട്ടത്തോടുമൊക്കെ ഇടാവുന്നതാണ്. 

വിനാഗിരി 

പൊതുവേ അടുക്കളയില്‍ ഉള്ള ഒരു  സാധനമാണ് വിനാഗിരി. മീനും പച്ചക്കറികളും ഇറച്ചിയുമൊക്കെ വൃത്തിയാക്കാനും നമ്മള്‍ വിനാഗിരി ഉപയോഗിക്കാറുണ്ട്. അതുപോലെ കറിവേപ്പില വളര്‍ത്താനും ഇത്തിരി വിനാഗിരി  മതിയാവും.  

രണ്ടു ലിറ്റര്‍ പുളിച്ച കഞ്ഞിവെള്ളത്തിലേക്ക് രണ്ടുതുള്ളി വിനാഗിരിയും കുറച്ച് ചാരവും ചേര്‍ത്ത് നന്നായി മിക്‌സ് ചെയ്യുക.  ഇത് ഇലകളില്‍ തളിച്ചു കൊടുക്കുകയും മരത്തിന്റെ മുരടില്‍ ഒഴിച്ചു കൊടുക്കുകയും ചെയ്യുക. ഇങ്ങനെ മാസത്തില്‍ ഒരിക്കല്‍ ചെയ്താല്‍ കറിവേപ്പില തഴച്ചു വളരുന്നതാണ്.