പത്തനംതിട്ട: ലഹരി ഉപയോഗം സംബന്ധിച്ച കേസുകള്‍ ഓരോ വര്‍ഷവും ക്രമാതീതമായി വര്‍ധിക്കുമ്പോഴും ഡി അഡിക്ഷന്‍ സെന്ററുകള്‍ ജില്ലകളില്‍ മാത്രം ഒതുങ്ങുന്നു. 14 ഡി അഡിക്ഷന്‍ സെന്ററുകളാണ് കേരളത്തില്‍ പ്രവര്‍ത്തിക്കുന്നത്. എന്നാല്‍ എല്ലാ താലൂക്ക് ആസ്ഥാനങ്ങളിലും സെന്ററുകളുടെ പ്രവര്‍ത്തനം വിപുലമാക്കണമെന്ന ആവശ്യമാണ് ഉയരുന്നത്. മദ്യവില്‍പ്പനയില്‍ നിന്നും ഒരു ശതമാനം അധികനികുതി ഏര്‍പ്പെടുത്തിയതിലൂടെ ലഭിക്കുന്ന വരുമാനമാണ് ലഹരി വിമോചന പ്രവര്‍ത്തനങ്ങള്‍ക്കായി വിനിയോഗിക്കുന്നത്.

വിമുക്തി മിഷന്റെ കീഴിലെ ഡി അഡിക്ഷന്‍ സെന്ററുകള്‍ ജില്ലാ-താലൂക്ക് ആശുപത്രികളില്‍ ലഭ്യമായ സ്ഥലങ്ങളിലാണ് പ്രവര്‍ത്തിക്കുന്നത്. ഒ.പി സേവനം, കൗണ്‍സലിങ്, മരുന്നുകള്‍, മാനസികോല്ലാസത്തിനുള്ള സൗകര്യം, യോഗ, ലഹരി മോചനം നേടുന്നവര്‍ക്കുള്ള കരുതല്‍ എന്നിവ ഇവിടെ ലഭ്യമാണ്. ലഹരിക്ക് അടിമയാകുന്നവരെ ഡീ അഡിക്ഷന്‍ സെന്ററുകളില്‍ എത്തിക്കണമെങ്കില്‍ കുടുംബത്തിന്റെ സഹകരണം ആവശ്യമാണ്. എന്നാല്‍ ഇവര്‍ക്ക് മതിയായ ചികിത്സ ലഭ്യമാക്കുന്നതിനായി പ്രത്യേക റാപ്പിഡ് ആക്ഷന്‍ സേനയെ ഏര്‍പ്പെടുത്തണമെന്നാണ് എക്‌സൈസ് വകുപ്പ് ചൂണ്ടിക്കാട്ടുന്നത്. പൊതുജനങ്ങള്‍ക്കായി വിവിധ കര്‍മപരിപാടികളും നടപ്പാക്കുന്നുണ്ട്.

വിദ്യാര്‍ഥികളെ സ്പോര്‍ട്സില്‍ ഇടപെടുത്തി ലഹരിവസ്തുക്കളുടെ ദുരുപയോഗം ഇല്ലാതാക്കാന്‍ ലക്ഷ്യമിട്ടാണ് മയക്കുമരുന്ന് വിരുദ്ധ ക്ലബ്ബുകള്‍ രൂപീകരിച്ചത്. ലഹരിക്ക് അടിപ്പെടുന്ന 21 വയസില്‍ താഴെയുള്ളവര്‍ക്ക് പ്രധാനമായും ചികിത്സ ലഭ്യമാക്കണമെന്നാണ് ലക്ഷ്യം. മുന്‍കാലങ്ങളില്‍ 15 -20 പ്രായപരിധിയില്‍ ഉള്ളവരായിരുന്നു കൗണ്‍സലിങ് സെന്ററുകളില്‍ കൂടുതലായും വന്നിരുന്നത്.

ഇപ്പോള്‍ 10 -15 വയസുകാര്‍ വരെ എത്തുന്നുണ്ട്. അപൂര്‍വമായി പത്ത് വയസ്സില്‍ താഴെയുള്ള കുട്ടികളും എത്തുന്നുണ്ടെന്ന് എക്‌സൈസ് അധികൃതര്‍ പറയുന്നു. മയക്കുമരുന്ന് കേസുകൂടി വരുന്നുണ്ടെങ്കിലും ആശങ്കപ്പെടുത്തുന്നത് ലഹരി ഉല്‍പന്നങ്ങളുടെ അളവിലുണ്ടായ ഞെട്ടിപ്പിക്കുന്ന വര്‍ധനവാണ്. മുന്‍പ് പിടിക്കപ്പെടുന്ന കേസുകളില്‍ ഒന്നോ രണ്ടോ കിലോ എന്നത് ഇപ്പോള്‍ അഞ്ച് മുതല്‍ 500 കിലോ വരെയൊക്കെയാകുന്നു. ഇത്ര അളവില്‍ ലഹരിവസ്തുക്കള്‍ കണ്ടെടുക്കണമെങ്കില്‍ അത്രയും ആവശ്യക്കാരും ഉണ്ടോ എന്ന തുടരന്വേഷണങ്ങളും നടക്കാതെ പോകുകയാണ്. ഇക്കാര്യത്തിലും വിമര്‍ശനം ഉയരുന്നുണ്ട്.

The increasing number of drug cases in India highlights the urgent need to increase the number of drug rehabilitation centers to provide adequate treatment and support for individuals battling addiction.