ദുബൈ: യു.എ.ഇയില്‍ നിന്ന് അഹമ്മദാബാദിലേക്കും മുംബൈയിലേക്കും വിമാനങ്ങള്‍ സര്‍വിസ് നടത്തുന്നുവെങ്കിലും, ഇന്ത്യയിലെ കനത്ത മഴ കാരണം ഈ നഗരങ്ങളില്‍ നിന്നും ദുബൈയിലേക്കും അബൂദബിയിലേക്കുമുള്ള സര്‍വിസുകള്‍ക്ക് കാലതാമസമുണ്ടാകുമെന്ന് അധികൃതര്‍ സൂചിപ്പിച്ചു. മുംബൈയിലേക്കുള്ള തങ്ങളുടെ വിമാനങ്ങള്‍ നിലവില്‍ സാധാരണ രീതിയില്‍ പ്രവര്‍ത്തിക്കുന്നുവെന്ന് സ്ഥിരീകരിക്കാന്‍ കഴിയുമെങ്കിലും, കനത്ത മഴ കാരണം അവിടെ നിന്ന് പുറപ്പെടുന്ന ഫ്‌ളൈറ്റുകള്‍ക്ക് കാലതാമസമുണ്ടാകുമെന്ന് ഇത്തിഹാദ് എയര്‍വേസ് വക്താവിനെ ഉദ്ധരിച്ചുള്ള റിപ്പോര്‍ട്ടില്‍ പറഞ്ഞു.

ഏറ്റവും പുതിയ വിവരങ്ങള്‍ക്കായി തങ്ങളുടെ വെബ്‌സൈറ്റിലോ മൊബൈല്‍ ആപ്പിലോ ഫ്‌ളൈറ്റുകളുടെ സ്റ്റാറ്റസ് പരിശോധിക്കാന്‍ യാത്രക്കാരോട് അദ്ദേഹം നിര്‍ദേശിച്ചു. മുംബൈ, അഹമ്മദാബാദ്, ചെന്നൈ എന്നിവിടങ്ങളിലെ തങ്ങളുടെ സര്‍വിസ് ബാധിക്കില്ലെന്ന് എമിറേറ്റ്‌സ് എയര്‍ലൈന്‍ വക്താവ് പറഞ്ഞു.

ദുബൈ ആസ്ഥാനമായ ഫ്‌ളൈ ദുബൈ അഹമ്മദാബാദിലേക്കും മുംബൈയിലേക്കുമുള്ള വിമാനങ്ങള്‍ ഷെഡ്യൂളനുസരിച്ച് പറക്കുന്നുവെന്ന് സ്ഥിരീകരിച്ചു. ഫളളൈദുബൈ.കോമില്‍ സര്‍വിസ് സ്റ്റാറ്റസ് പരിശോധിക്കാന്‍ വക്താവ് യാത്രക്കാരെ ഓര്‍മിപ്പിച്ചു.
മുംബൈയിലും സമീപ പ്രദേശങ്ങളിലും തുടരുന്ന കനത്ത മഴ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിലെ ഫ്‌ലൈറ്റ് പ്രവര്‍ത്തനങ്ങളെ തടസ്സപ്പെടുത്തിയിട്ടുണ്ട്.

ശക്തമായ മഴ മൂലം സ്‌കൂളുകളും കോളജുകളും അടച്ചിട്ടിരിക്കുന്ന സാഹചര്യത്തില്‍ സ്‌പൈസ് ജെറ്റ്, എയര്‍ ഇന്ത്യ, ഇന്‍ഡിഗോ എന്നിവയുടെ വിമാന സര്‍വിസുകള്‍ക്കും കാലതാമസമുണ്ടാകുമെന്നാണ് ലഭിക്കുന്ന വിവരം.