അങ്കോല: ഷീരൂര്‍ മണ്ണിടിച്ചിലില്‍ അകപ്പെട്ട അര്‍ജുനായുള്ള ഇന്നത്തെ തെരച്ചിലിലും ഒന്നും കണ്ടെത്താനായില്ല. രക്ഷാദൗത്യം അതീവ ദുഷ്‌കരമാണ്. മാല്‍പെ സംഘം ഡൈവിങ് അവസാനിപ്പിച്ച് തിരിച്ചുകയറി. പുഴയില്‍ മണ്ണും ചളിയും മരത്തടികളുമല്ലാതെ ഒന്നും കണ്ടെത്താനായില്ലെന്ന് കാര്‍വാര്‍ എം.എല്‍.എ സതീഷ് കൃഷ്ണ സെയില്‍ പറഞ്ഞു.

അടുത്ത 21 ദിവസം മഴയ്ക്ക് സാധ്യതയുണ്ട്. തിരച്ചിലിന് അത്യാധുനിക യന്ത്രങ്ങള്‍ വേണമെന്നും അവ കൊണ്ടുവരാന്‍ ദിവസങ്ങളെടുക്കുമെന്നും എം.എല്‍.എ പറഞ്ഞു. ഇന്ന് വൈകീട്ട് ഉന്നതതല യോഗം ചേരുമെന്നും കര്‍ണാടക മുഖ്യമന്ത്രിയെ കാര്യങ്ങള്‍ ധരിപ്പിക്കുമെന്നും സതീഷ് കൃഷ്ണ സെയില്‍ കൂട്ടിച്ചേര്‍ത്തു.

നദി ശാന്തമായാല്‍ മാത്രമേ ദൗത്യം തുടരാന്‍ സാധിക്കൂവെന്ന് അദ്ദേഹം പറഞ്ഞു. പുഴയ്ക്ക് അടിയിലെ ചെളിയും കല്ലും മരവുമാണ് ദൗത്യത്തിന് വെല്ലുവിളിയെന്ന് കാര്‍വാര്‍ എംഎല്‍എ വ്യക്തമാക്കി.