ദുബൈ: വീടിന്റെ തൊട്ടടുത്തുള്ള കടകളിലേക്കും മറ്റും പോകുമ്പോൾ ഹെൽമറ്റ് വെക്കാതെയും സീറ്റ് ബെൽറ്റ് ഇടാതെയും പോകുന്നവരാണ് നമ്മളിൽ മിക്കവരും. പൊലിസ് പിടിക്കുമ്പോൾ ദാ ഈ അടുത്ത കടയിൽ പോയതാണെന്ന് പറഞ്ഞ് പലരും രക്ഷപ്പെടാറുമുണ്ട്. എന്നാൽ ആ 'കളി' ദുബൈയിൽ വേണ്ട. സീറ്റ് ബെൽറ്റ് ഇടാതെ തൊട്ടടുത്ത കടയിൽ പോയാലും യാത്രയ്ക്കു 400 ദിർഹം പിഴ നൽകേണ്ടി വരും. അത് ചിലപ്പോൾ നിങ്ങൾ കടയിൽ നിന്ന് വാങ്ങുന്ന സമാധാനത്തെക്കാൾ അധികമായിരിക്കും. പിഴ കൂടെ 4 ബ്ലാക്ക് പോയിന്റ് ലൈസൻസിൽ ചേർക്കുകയും ചെയ്യും. പാർപ്പിട മേഖലയിലെ ഗതാഗതനിയമ ലംഘകരെ കുരുക്കാൻ ദുബൈ പൊലിസ് പുതിയ റഡാർ പുറത്തിറക്കി.

പാർപ്പിട മേഖലകളിൽ പിടിക്കപ്പെടില്ലെന്ന ധാരണയിൽ പലരീതിയിലുള്ള കുറ്റകൃത്യങ്ങൾ ചെയ്യാനും ഡ്രൈവർമാർ മുതിരുന്നുവെന്ന റിപ്പോർട്ടിന്റെ അടിസ്ഥാനത്തിലാണ് ദുബൈ പൊലിസിന്റെ നടപടി. റഡാർ വഴി പാർപ്പിട മേഖലയിലെ പ്രധാന റോഡുകൾ മുഴുവൻ ട്രാഫിക് റഡാറിന്റെ നിയന്ത്രണത്തിലായിരിക്കും. സീറ്റ് ബെൽറ്റ് ധരിക്കാത്തത്, അമിതവേഗം, മൊബൈൽ ഉപയോഗം, ട്രാഫിക് ലംഘനങ്ങൾ തുടക്കി എല്ലാം റഡാർ കണ്ടെത്തും.

റഡാറുകൾ നിയമലംഘനം കണ്ടെത്തുമ്പോൾ ഡ്രൈവർമാർക്ക് ഉടൻ അറിയാൻ കഴിയില്ലെന്നതാണ് ഈ 'നിശബ്ദ റഡാറുകളുടെ' പ്രത്യേകത. പിഴ അടയ്ക്കാനുള്ള സന്ദേശം ഫോണിൽ കിട്ടുമ്പോൾ മാത്രമേ ഡ്രൈവർക്ക് അറിയാൻ സാധിക്കൂ.‌ റഡാറുകളിൽ നിയമലംഘനങ്ങൾ പതിയുന്ന അതേസമയം തന്നെ പൊലിസിന്റെ കൺട്രോൾ റൂമിലിരുന്നു ഇവ വീക്ഷിക്കാൻ സാധിക്കും. അതിനാൽ ലഭിക്കുന്ന വിഡിയോകൾ പലതവണ കണ്ട് ഉറപ്പാക്കിയ ശേഷമായിരിക്കും ഫൈൻ നൽകുക. അതിനാൽ അപ്പീൽ പോയാലും രക്ഷയുണ്ടാകില്ല.

സീറ്റ് ബെൽറ്റ് ധരിക്കാത്തതിന് 400 ദിർഹം ആണ് പിഴ. കൂടെ 4 ബ്ലാക്ക് പോയിന്റും ലഭിക്കും. മൊബൈൽ ഫോൺ ഉപയോഗിച്ച് യാത്ര ചെയ്താൽ 800 ദിർഹമാണ് പിഴ. കൂടെ 4 ബ്ലാക്ക് പോയിന്റ്. കാൽനടക്കാർക്കുള്ള ക്രോസിങ്ങിൽ വാഹനമോടിച്ചാൽ 500 ദിർഹം പിഴ നൽകേണ്ടി വരും. മുന്നിലെ വാഹനങ്ങളുമായി സുരക്ഷിത അകലം പാലിച്ചില്ലെങ്കിലും 500 ദിർഹം പിഴ നൽകേണ്ടി വരും.