റബ്ബര്‍ വില ദിനംപ്രതി ഉയരുകയാണ്. ആഭ്യന്തര വിലയ്‌ക്കൊപ്പമല്ലെങ്കിലും അന്താരാഷ്ട്ര വിലയും കയറി തുടങ്ങി. ഇറക്കുമതിയിലൂടെ വിലയിടിക്കാമെന്ന ടയര്‍ കമ്പനികളുടെ പദ്ധതിയും വെട്ടിലായിരിക്കുകയാണ്. വിപണിയിലേക്ക് ചരക്കെത്തുന്നതിലുണ്ടായ ഗണ്യമായ കുറവാണ് ഇപ്പോഴത്തെ വില വര്‍ധനയ്ക്ക് കാരണം.
ആര്‍.എസ്.എസ് 4ന് 224-226 രൂപയോളം നല്‍കിയണ് ചെറുകിട വ്യാപാരികള്‍ റബര്‍ഷീറ്റ് ശേഖരിക്കുന്നത്. മഴ കനത്തതിനാല്‍ തോട്ടങ്ങളില്‍ ടാപ്പിംഗ് തീരെ കുറഞ്ഞിട്ടുണ്ട്. ഷീറ്റാക്കി വിറ്റിരുന്ന പലരും ഈ സാഹചര്യത്തില്‍ ലാറ്റക്‌സ് വില്പനയിലേക്ക് തിരിഞ്ഞിട്ടുണ്ട്.

വിപണിയിലേക്കുള്ള ചരക്ക് വരവ് കുറഞ്ഞതോടെ ഇറക്കുമതിക്കുള്ള നീക്കങ്ങള്‍ ടയര്‍ കമ്പനികള്‍ ശക്തമാക്കിയിട്ടുണ്ട്. എന്നാല്‍ കണ്ടെയ്‌നര്‍ ലഭ്യതയുടെ കുറവും, തായ്‌ലന്‍ഡില്‍ ഉള്‍പ്പെടെ ഉത്പാദനം മുന്‍വര്‍ഷത്തേക്കാള്‍ ഏറെ കുറവുമായതിനാല്‍ ഈ നീക്കവും ഫലപ്രദമല്ല. 190 രൂപയാണ് തായ്‌ലന്‍ഡ് റബ്ബറിന്റെ വില. 32 രൂപയാണ് ആഭ്യന്തരഅന്താരാഷ്ട്ര വിപണികള്‍ തമ്മിലുള്ള വില വ്യത്യാസം. സാധാരണഗതിയില്‍ അന്താരാഷ്ട്ര വില ഉയര്‍ന്നു നില്‍ക്കുകയും ആഭ്യന്തര വില 15-25 രൂപ താഴ്ന്നു നില്‍ക്കുകയുമായിരുന്നു പതിവ് എന്നാല്‍ ഇത്തവണ ഈ രീതിക്ക് മാറ്റംവന്നു.

2011 ഏപ്രില്‍ അഞ്ചിനായിരുന്നു കേരളത്തില്‍ റബ്ബര്‍വില ഏറ്റവും ഉയര്‍ന്ന നിരക്കിലെത്തിയത്. അന്ന് 243 രൂപയായിരുന്നു വില. അതിനു മുമ്പോ ശേഷമോ ഇത്തരമൊരു വിലക്ക് റബ്ബര്‍ വില്‍ക്കാന്‍ കര്‍ഷകര്‍ക്ക് കഴിഞ്ഞിട്ടില്ല. ഇപ്പോള്‍ സാഹചര്യങ്ങളെല്ലാം ഒത്തുവന്നപ്പോള്‍ കര്‍ഷകര്‍ക്ക് കാര്യമായ നേട്ടമില്ലാത്ത അവസ്ഥയുമാണ്. ഈ രീതിയില്‍ മുന്നോട്ടു പോകുകയാണെങ്കില്‍ ഓഗസ്റ്റില്‍ റബ്ബര്‍ വില 250 ലെത്തുമെന്നാണ് വിദഗ്ദര്‍ പറയുന്നത്.