മേപ്പാടി: ചൂരൽമലയിൽ ഉരുൾപൊട്ടിയ ദിവസമാണ് അച്ഛനും അമ്മയും പറക്കമുറ്റാത്ത നാലു കുരുന്നുകളുമടങ്ങുന്ന ആദിവാസി കുടുംബം അട്ടമല വനത്തിലേക്ക് ആത്മരക്ഷാർഥം പലായനം ചെയ്തത്. ഉരുളിനൊപ്പം കഠിനമായ വിശപ്പും കൂടിയാണ് കാടുകയറാൻ കുടുംബത്തെ പ്രേരിപ്പിച്ചത്. ദുരന്തമുണ്ടായതിനു പിന്നാലെ അട്ടമല വനത്തിൽ പതിവു തിരച്ചിലിനുപോയ വനംവകുപ്പ് ഉദ്യോഗസ്ഥരാണ് നാലു വയസ് തോന്നിക്കുന്ന പിഞ്ചുകുഞ്ഞിനെയുമെടുത്ത് ആദിവാസി യുവതി കാട്ടിൽ അലയുന്നത് കണ്ടത്. കാര്യം തിരക്കിയപ്പോൾ വെറുതെ ഇറങ്ങിയതാണെന്നു മറുപടി.  രണ്ടുദിവസം കഴിഞ്ഞ് വ്യാഴാഴ്ച രാവിലെയും യുവതിയെയും കുഞ്ഞിനെയും ഇതേ സ്ഥലത്ത് വീണ്ടും കണ്ടു. വിശപ്പുസഹിക്കവയ്യാതെ പരിക്ഷീണരായിരുന്നു ഇരുവരുമെന്ന് കൽപ്പറ്റ റേഞ്ച് ഫോറസ്റ്റ് ഓഫിസർ ആഷിഫ് കേളോത്ത് പറഞ്ഞു. 
കഴിഞ്ഞദിവസം തങ്ങളെ കണ്ടപ്പോഴുള്ള ഭയമൊന്നും അപ്പോൾ യുവതിക്കുണ്ടായിരുന്നില്ല. മുണ്ടക്കയം സെക്ഷൻ ഫോറസ്റ്റ് ഓഫിസർ ജയചന്ദ്രൻ, കൽപ്പറ്റ റേഞ്ച് ബീറ്റ് ഫോറസ്റ്റ് ഓഫിസർ കെ.അനിൽകുമാർ, ആർ.ആർ.ടി അംഗം അനൂപ് തോമസ് എന്നിവരും ആഷിഫിന്റെ സംഘത്തിലുണ്ടായിരുന്നു. 

ഇവർ യുവതിയോട് കാര്യങ്ങൾ ആരാഞ്ഞു. പേര് ശാന്ത. ചൂരൽമല ഏറാട്ടുകുണ്ട് ഊരിൽ താമസം. ഭർത്താവും മറ്റു മൂന്നു കുഞ്ഞുങ്ങളും മലമുകളിലെ പാറപ്പൊത്തിൽ കഴിയുന്ന കാര്യവും ശാന്ത വെളിപ്പെടുത്തി. ക്ഷീണിച്ച് അവശയായ യുവതിയെയും കുഞ്ഞിനെയും അടുത്തുകണ്ട പാടിയിലേക്ക് മാറ്റി. തങ്ങളുടെ കൈയിലുണ്ടായിരുന്ന ബെഡ്ഷീറ്റ് വനംവകുപ്പ് ജീവനക്കാർ അവർക്കുനൽകി. ശാന്ത പറഞ്ഞുകൊടുത്ത വഴിയിലൂടെ ചെങ്കുത്തായ മലകയറി ഉദ്യേഗസ്ഥർ മുകളിലെത്തി. വലിയൊരു പാറപ്പൊത്തിൽ വിശന്നൊട്ടിയ വയറുമായി ചുരുണ്ടുകൂടി കിടക്കുകയായിരുന്നു ഭർത്താവ് കൃഷ്ണനും ഒന്നും രണ്ടും മൂന്നും വയസുള്ള കുഞ്ഞുങ്ങളും. 

കുഞ്ഞുങ്ങളെല്ലാവരും നഗ്നരായിരുന്നു. തങ്ങളുടെ സംഘത്തിലുള്ളവർ ഉടൻ കുട്ടികളെ കൈയിലെടുത്ത് ചൂടുനൽകിയെന്ന് ആഷിഫ് പറഞ്ഞു. കൈയിലിരുന്ന ഭക്ഷണവും വെള്ളവും കൊടുത്ത് ചേർത്തുനിർത്തി. കൃഷ്ണനെ പറഞ്ഞു മനസിലാക്കി കുട്ടികൾക്കൊപ്പം വൈകാതെ കഠിനമായ മലയിറങ്ങി. ശാന്തയ്ക്ക് ചെറിയ ആരോഗ്യപ്രശ്നമുണ്ടെന്നും അടിവാരത്തു നിൽക്കുന്നുവെന്നും പറഞ്ഞതോടെയാണ് കൃഷ്ണൻ മലയിറങ്ങാൻ തയാറായത്. കൈയിലുണ്ടായിരുന്ന മറ്റൊരു ബെഡ്ഷീറ്റ് മൂന്നായി കീറി മൂന്നു കുഞ്ഞുങ്ങളെയും അനൂപും അനിലും കൃഷ്ണനും ശരീരത്തോട് ചേർത്തുകെട്ടി. താഴേക്കുള്ള യാത്ര അതീവ ദുഷ്‌കരമായിരുന്നു. പലപ്പോഴും സംഘാംഗങ്ങൾ അടിതെറ്റി അഗാധമായ കൊക്കയിൽ വീഴാൻ പോയി. രണ്ടു ദിവസത്തിനുശേഷം അടിവാരത്ത് അമ്മയും കുഞ്ഞുങ്ങളും കണ്ടുമുട്ടുന്ന കാഴ്ച കണ്ണുനനയിക്കുന്നതായിരുന്നു.  ചെറിയ കുഞ്ഞുങ്ങൾക്ക് അമ്മ മുലപ്പാൽ നൽകി. വിശന്നുവലഞ്ഞപ്പോൾ ഭക്ഷണം നൽകിയതുകൊണ്ടോ കൊടുംതണുപ്പിൽ ചൂടാറ്റിയതുകൊണ്ടോ ആ കുഞ്ഞുങ്ങൾ വനപാലകരുമായി പെട്ടെന്ന് അടുത്തു. പുറം ലോകത്തെത്തിയതിന്റെ ആശങ്കയും ആഹ്ലാദവും ആ കുഞ്ഞുകണ്ണുകളിൽ ഒളിമിന്നി. നിരാലംബരായ ആറുപേരെ ജീവിതത്തിലേക്കു കൈപിടിച്ചതിന്റെ സന്തോഷം ഉദ്യോഗസ്ഥരുടെ കണ്ണുകളിലും.

A tribal family of six, including four children, was rescued by forest officials in Kerala's Wayanad district after they were stranded in the forest for days without food or water. The family had fled to the forest after their home was destroyed in a landslide.