ഷാര്‍ജ: ഷാര്‍ജ ചാരിറ്റി ഇന്റര്‍നാഷനല്‍ (എസ്.സി.ഐ) ഈ വര്‍ഷം ആദ്യ പകുതിയില്‍ വിവിധ രാജ്യങ്ങളിലായി 6.7 ദശലക്ഷം ദിര്‍ഹം ചെലവ് വരുന്ന 18 പുതിയ സമുച്ചയങ്ങള്‍ ആരംഭിച്ചു. ബംഗ്ലാദേശിലെ 13, താജിക്കിസ്ഥാനിലെ രണ്ട്, ഘാനയിലെ രണ്ട്, ഫിലിപ്പീന്‍സിലെ ഒന്ന് എന്നിവയുള്‍പ്പെടെ പുതിയ സൗകര്യങ്ങള്‍ പ്രാദേശിക ജീവിത സാഹചര്യങ്ങള്‍ മെച്ചപ്പെടുത്താനും താഴ്ന്ന റെസിഡന്‍ഷ്യല്‍ ഏരിയകളില്‍ അവശ്യ സൗകര്യങ്ങള്‍ പ്രദാനം ചെയ്യാനും ലക്ഷ്യമിടുന്നു.

 പദ്ധതികള്‍ക്കുള്ള ധനസഹായം നല്‍കിയ ദാതാക്കള്‍ നിര്‍ദിഷ്ട പ്രദേശങ്ങളെ പിന്തുണയ്ക്കാനുള്ള ആഗ്രഹം നേരത്തെ തന്നെ പ്രകടിപ്പിച്ചിരുന്നു. 
പ്രൊജക്റ്റ് ലൊക്കേഷനുകളുടെ തെരഞ്ഞെടുപ്പ് ദാതാക്കളുടെ അഭ്യര്‍ഥനകളനുസരിച്ചാണ്. അടിയന്തര സേവനങ്ങള്‍ ആവശ്യമുള്ള വിദൂര പ്രദേശങ്ങള്‍ തിരിച്ചറിയാന്‍ പ്രാദേശിക ഓഫീസുകളിലൂടെയും നടപ്പിലാക്കുന്ന സമിതികളിലൂടെയും എസ്.സി.ഐ ഏകോപിപ്പിക്കുന്നു. കൂടാതെ, എല്ലാ പ്രൊജക്റ്റ് വിശദാംശങ്ങളും പരിരക്ഷിക്കുന്നുവെന്ന് ഉറപ്പാക്കാന്‍ സമഗ്ര പഠനങ്ങള്‍ നടത്തുകയും ചെയ്യുന്നു. 

ഈ വര്‍ഷം കെട്ടിട സമുച്ചയങ്ങളുടെ എണ്ണത്തില്‍ 5.8% വര്‍ധനയുണ്ടായതായി എസ്.സി.ഐയിലെ പ്രൊജക്ട് സെക്ടര്‍ മേധാവി മുഹമ്മദ് അല്‍ സാരി എടുത്തു പറഞ്ഞു. കഴിഞ്ഞ വര്‍ഷത്തെ അപേക്ഷിച്ച് 18 പുതിയവ സ്ഥാപിച്ചു കഴിഞ്ഞിട്ടുണ്ട്. എസ്.സി.ഐയുടെ ഉപയോക്തൃ സൗഹൃദ ഓണ്‍ലൈന്‍ സേവനങ്ങള്‍, ബാങ്ക് കൈമാറ്റങ്ങള്‍, സംഭാവനാ പ്രതിനിധി സേവനം, അല്ലെങ്കില്‍ ഏതെങ്കിലും എസ്.സി.ഐ ബ്രാഞ്ചില്‍ നേരിട്ടോ സംഭാവനകള്‍ നല്‍കാം. ടോള്‍ ഫ്രീ നമ്പറായ 80014 വഴിയും സംഭാവനകള്‍ എത്തിക്കാനാകും.