ഇരിട്ടി: മാടത്തില്‍-കൂട്ടുപുഴ അന്തര്‍ സംസ്ഥാന പാതയില്‍ വന്മരം കടപുഴകി വീണ് മണിക്കൂറുകളോളം ഇരിട്ടി-ബംഗളരു പാതയില്‍ ഉള്‍പെടെ ഗതാഗതം തടസപെട്ടു. കഴിഞ്ഞ ദിവസം അര്‍ധ രാത്രി ബെന്‍ഹില്‍ സ്‌കൂളിനു സമീപമാണ് വന്‍ ആഞ്ഞിലി മരം കടപുഴകി റോഡിലേക്ക് പതിച്ചത്. ഈ സമയം വാഹനങ്ങള്‍ റോഡിലില്ലാത്തതിനാല്‍ വന്‍ ദുരന്തം ഒഴിവായി. സമീപത്തെ സ്‌കൈലൈന്‍ വാട്ടര്‍ സര്‍വിസ് എന്ന വര്‍ക്ക്‌ഷോപ്പ് മരം വീണ് പൂര്‍ണമായി തകരുകയും മുറിക്കുള്ളില്‍ കിടന്നുറങ്ങുകയായിരുന്ന തൊഴിലാളികളായ ടോമി, ആനന്ദ് എന്നിവര്‍ക്ക് സാരമായി പരിക്കേല്‍ക്കുകയും ചെയ്തു. ഇവരെ ഇരിട്ടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. രണ്ടു മണിക്കൂറോളം പണിപെട്ടാണ് മരം മുറിച്ചു മാറ്റി ഗതാഗതം പുനസ്ഥാപിച്ചത്.