കണ്ണൂര്‍: നാറാത്ത് ടൗണില്‍ സ്വകാര്യ ബസുകള്‍ കൂട്ടിയിടിച്ച് 30ലേറെ പേര്‍ക്ക് പരുക്കേറ്റു. ഇന്നലെ രാവിലെ പത്തോടെയായിരുന്നു പാവന്നൂര്‍ കടവില്‍ നിന്നു കണ്ണൂര്‍ ആശുപത്രിയിലേക്കു വരികയായിരുന്ന പി.ബി.എസ് ബസും ജില്ലാ ആശുപത്രി-അരിമ്പ്ര റൂട്ടിലോടുന്ന പത്മനാഭ ബസും കൂട്ടിയിടിച്ചത്. ഒരു കാറിനെ മറികടക്കാനുള്ള ശ്രമത്തിനിടെയായിരുന്നു അപകടം. ബസിനു പിറകില്‍ കാറും ഇടിച്ചു. ബസിന്റെ മുന്‍വശത്തെ ചില്ലുകള്‍ പൂര്‍ണമായും തകര്‍ന്നു. പരുക്കേറ്റവരെ നാട്ടുകാരും വ്യാപാരികളും ചേര്‍ന്ന് കമ്പിലെ സ്വകാര്യ ആശുപത്രിയിലെത്തിച്ചു. മയ്യില്‍ പൊലിസ് സ്ഥലത്തെത്തി ഗതാഗതം പുനസ്ഥാപിച്ചു.