ന്യൂഡല്‍ഹി: ഇന്ത്യയുടെ മുന്‍ ക്യാപ്റ്റനും ഗോള്‍കീപ്പറുമായ പി.ആര്‍ ശ്രീജേഷിന് ഹോക്കി ഇന്ത്യയുടെ ആദരം. പാരീസ് ഒളിമ്പിക്സോടെ വിരമിച്ച ശ്രീജേഷിനൊപ്പം അദ്ദേഹം ധരിച്ചിരുന്ന 16-ാം നമ്പര്‍ ജേഴ്സിയും വിരമിക്കുന്നതായി ഹോക്കി ഇന്ത്യ ബുധനാഴ്ച പ്രഖ്യാപിച്ചു. 

സീനിയര്‍ ടീമില്‍ ആര്‍ക്കും ഇനി 16ാം നമ്പര്‍ ജഴ്‌സി നല്‍കില്ലെന്ന് ഹോക്കി ഇന്ത്യ അറിയിച്ചു. 

പാരിസ് ഒളിംപിക്‌സോടെ താന്‍ വിരമിക്കുമെന്ന് നേരത്തെ തന്നെ ശ്രീജേഷ് പ്രഖ്യാപിച്ചിരുന്നു. ഗെയിംസിലെ എട്ടു മത്സരങ്ങളിലായി നേരിട്ട 62 ഷോട്ടുകളില്‍ 50 എണ്ണം സേവ് ചെയ്ത് അസാമാന്യ പ്രകടനം കാഴ്ച്ച വെച്ചാണ് ഇന്ത്യയ്ക്ക് ശ്രീജേഷ് വെങ്കലം സമ്മാനിച്ചത്. അതേസമയം, വിരമിക്കലിന് പിന്നാലെ താരത്തെ ഇന്ത്യന്‍ ജൂനിയര്‍ ഹോക്കി ടീമിന്റെ പരിശീലകനായി ഹോക്കി ഇന്ത്യ സെക്രട്ടറി ജനറല്‍ ബോലനാഥ് പ്രഖ്യാപിച്ചിരുന്നു.