കിഴിശ്ശേരി: വഴിയോരങ്ങളില്‍ മാലിന്യം കുന്നുകൂടുന്നതു പ്രദേശവാസികളേയും യാത്രക്കാരേയും ബുദ്ധിമുട്ടിലാക്കുന്നു. പച്ചക്കറി അവശിഷ്ടങ്ങള്‍ അടക്കമുള്ളവ ചീഞ്ഞളിഞ്ഞു ദുര്‍ഗന്ധം വമിക്കുകയാണ്.
കച്ചവടക്കാരില്‍ ചിലരാണു റോഡരികില്‍ മാലിന്യം തള്ളുന്നത്. ഇതിനോടൊപ്പം പലരും മത്സ്യ-മാംസാവശിഷ്ടങ്ങളും നിക്ഷേപിക്കുന്നു. കിഴിശ്ശേരി, കൊണ്ടേണ്ടാട്ടി റോഡിലും ഒന്നാംമൈല്‍ ചുള്ളിക്കോടു റോഡിലും മാലിന്യം നിറഞ്ഞിരിക്കുകയാണ്.
ചുള്ളിക്കോട് ഹയര്‍സെക്കണ്ടന്‍ഡറി സ്‌കൂളിലേക്കു ദുര്‍ഗന്ധം സഹിച്ചാണു വിദ്യാര്‍ഥികള്‍ക്കു നടന്നു പോകേണ്ടത്. വാഹന യാത്രക്കാര്‍ക്കുവരെ ഇവിടെ എത്തിയാല്‍ മൂക്കുപൊത്തേണ്ട അവസ്ഥയാണ്.
രാത്രികാലങ്ങളില്‍ ചാക്കുകളിലും കവറുകളിലുമാക്കി ഫ്രൂട്‌സ് കടകളിലെ മാലിന്യങ്ങള്‍ വരെ ഇവിടെ തള്ളുന്നു.
മഴപെയ്താല്‍ അവ റോഡിലേക്ക്  ഒലിച്ചിറങ്ങുകയാണ്. മാലിന്യങ്ങള്‍ കുന്നുകൂടിയതിനാല്‍ പ്രദേശങ്ങളില്‍ തെരുവുനായ്ക്കളുടെ ശല്യവും രൂക്ഷമാവുകയാണ്.