പ്രശസ്ത ഇന്‍വെസ്റ്റ്‌മെന്റ് ബാങ്കിംഗ് സ്ഥാപനങ്ങളിലൊന്നായ ഗോള്‍ഡ്മാന്‍ സാക്‌സില്‍ ഇന്‍വെസ്റ്റ്‌മെന്റ് ബാങ്കര്‍ എന്ന നിലയില്‍ നിന്ന് ഒരു ചെറു സംരംഭകനിലേയ്ക്കുള്ള ദൂരം വളരെ വലുതാണ്. പലര്‍ക്കും അത് ഉള്‍ക്കൊള്ളാന്‍ പോലും സാധിച്ചെന്ന് വരില്ല. ഇന്‍വെസ്റ്റ്‌മെന്റ് ബാങ്കര്‍ എന്ന നിലയില്‍ കൃഷ്ണന്‍ മഹാദേവന്റെ ജീവിതം സന്തുഷ്ടമായിരുന്നു. പക്ഷെ തന്റെ ആഗ്രഹത്തെയും, പാരമ്പര്യത്തെയും പിന്തുടരാനായി അദ്ദേഹം ജോലി ഉപേക്ഷിച്ചു. തുടര്‍ന്ന് ബെംഗളൂരുവിലെ വിജ്ഞാന്‍ നഗറില്‍ അമ്മയ്‌ക്കൊപ്പം അയ്യര്‍ ഇഡ്ഡലി എന്ന പേരില്‍ ഒരു ചെറു സംരംഭം ആരംഭിച്ചു.

കൃഷ്ണന്റെ  കുടുംബ ബിസനസുമായിരുന്നു 2001 ല്‍ അച്ഛന്‍ സ്ഥാപിച്ച രുചികരമായ ചൂടുള്ള ഇഡ്ഡലിക്ക് പേരുകേട്ട അയ്യര്‍ ഇഡ്‌ലി. ഇതിനായി ഇന്‍വെസ്റ്റ്‌മെന്റ് ബാങ്കറെന്ന ജോലി ഉപേക്ഷിച്ച്  റിസ്‌ക് എടുത്ത അദ്ദേഹത്തെ ദൈവവും കൈവിട്ടില്ല. കൃഷ്ണന്റെ അച്ഛന്‍ അയ്യര്‍ ഇഡ്‌ലി ആരംഭിച്ച് ഏകദേശം 19 വര്‍ഷത്തോളമായി. ദിനംപ്രതി വിപണിയിലെ മത്സരം ശക്തമാകുന്നുണ്ടെങ്കിലും, ഇന്നും അയ്യര്‍ ഇഡ്ഡലി തേടി എത്തുന്നവര്‍ ഏറെയാണ്.

വിളമ്പുന്ന ഭക്ഷണത്തിന്റെ ഉയര്‍ന്ന ഗുണമേന്മയാണ് അയ്യര്‍ ഇഡ്ഡലിയുടെ ഹൈലൈറ്റ്. വളരെ ചെറിയ കടയായതുകൊണ്ടുതന്നെ ചെലവ് കുറയ്ക്കാനും, കുറഞ്ഞ നിരക്കില്‍ ഇഡ്ഡലി വാഗ്ദാനം ചെയ്യാനും കൃഷ്ണന് സാധിക്കുന്നു. പ്രതിമാസം 50,000 ത്തോളം ഇഡ്ഡലികളാണ് ഈ കടയില്‍ വിറ്റഴിക്കുന്നത്. കൃഷ്ണനും അമ്മ ഉമയുമാണ് ഇന്ന് അയ്യര്‍ ഇഡ്ഡലിയുടെ നടത്തിപ്പുകാര്‍. ആഡംബര ചുറ്റുപാടുകളും, മനം മയക്കുന്ന ഇന്റീരിയറുകളുമല്ല മറിച്ച് ഗുണനിലവാരം, പുതുമ, വൃത്തി, രുചി എന്നിവയാണ് വേണ്ടതെന്ന് ഈ അമ്മയും, മകനും ഉറച്ചു വിശ്വസിക്കുന്നു.

Meet Krishnan Mahadevan, who left his job as an investment banker to follow his passion for food and started Ayyar Idli, a popular idli brand, proving that success can be achieved by following one's heart.