ഓണക്കാലത്ത് പൊതു വിപണിയില്‍ ഉണ്ടാകാനിടയുള്ള വിലക്കയറ്റം തടഞ്ഞു നിര്‍ത്തുന്നതിന് ശക്തമായ നടപടികളുമായി സര്‍ക്കാര്‍. ഇതിന്റെ ഭാഗമായി സിവില്‍ സപ്ലൈസ് കോര്‍പറേഷന് 225 കോടി രൂപ അനുവദിച്ചതായി ധനമന്ത്രി കെ.എന്‍ ബാലഗോപാല്‍ വ്യക്തമാക്കി. 

ഓണക്കാലത്ത് പച്ചക്കറിപലവ്യഞ്ജനങ്ങള്‍ക്ക് വില കൂടാന്‍ സാധ്യതയുണ്ടെന്ന്് സപ്ലൈകോ വിലയിരുത്തുന്നു. സപ്ലൈകോ സ്‌റ്റോറുകളിലൂടെ ജനങ്ങള്‍ക്ക് കുറഞ്ഞ വിലയ്ക്ക് കൂടുതല്‍ സാധനങ്ങള്‍ എത്തിക്കാന്‍ സാധിച്ചാല്‍, പൊതുവിപണിയിലെ വിലക്കയറ്റം പിടിച്ചു നിര്‍ത്താന്‍ കഴിയുമെന്നാണ് അധികൃതര്‍ കണക്കുകൂട്ടല്‍.

ഓണക്കാലത്ത് സബ്‌സിഡി സാധനങ്ങളുടെ ക്ഷാമം പൂര്‍ണമായും പരിഹരിക്കാനുളള പ്രവര്‍ത്തനങ്ങളിലാണ് സപ്ലൈകോ ഇപ്പോള്‍, സബ്‌സിഡി സാധനങ്ങളായ മട്ടയരി, ജയ അരി, ചെറിയ കടല, മല്ലി, മുളക്, വെളിച്ചെണ്ണ, പീസ് പരിപ്പ് തുടങ്ങിയവ സ്റ്റോറുകളില്‍ ആവശ്യത്തിന് ലഭ്യമാണ്. അതേസമയം വന്‍പയര്‍, ചെറുപയര്‍, പഞ്ചസാര, പച്ചരി, തുവരപ്പരിപ്പ്, ഉഴുന്ന് തുടങ്ങിയവയുടെ ലഭ്യത വളരെ കുറുവാണെന്ന പരാതികള്‍ ഉയരുന്നുണ്ട്. കൂടാതെ ഏറെ നാളുകളായി സപ്ലൈകോ സ്റ്റോറുകളില്‍ പഞ്ചസാര ലഭ്യമല്ലെന്ന പരാതിയും നിലനില്‍ക്കുന്നു. 

ഓണത്തിനു മുമ്പ് തന്നെ 13 ഇനം സബ്‌സിഡി സാധങ്ങളും സ്റ്റോറുകളില്‍ എത്തിക്കാനുളള ശ്രമത്തിലാണ് അധികൃതരുള്ളത്. സാധനങ്ങള്‍ വിതരണത്തിന് എത്തിക്കുന്നവരില്‍ ഭൂരിഭാഗവും സപ്ലൈകോയുമായി സഹകരിക്കാമെന്ന് അറിയിച്ചിട്ടുണ്ട്.   ഓണച്ചന്തകള്‍ സെപ്റ്റംബര്‍ നാലുമുതല്‍ തുടങ്ങാനുള്ള തയാറെടുപ്പിലാണ് സപ്ലൈകോ. ഓണക്കാലത്ത് സപ്ലൈകോ ഔട്ട്‌ലെറ്റുകളില്‍ സബ്‌സിഡി, സബ്‌സിഡിയേതര സാധനങ്ങള്‍ കൂടുതലായി എത്തിക്കാനുള്ള പ്രവര്‍ത്തനങ്ങളും പുരോഗമിക്കുന്നു.

വിപണിയില്‍ലെ വിലക്കയറ്റം തടയുക എന്ന ലക്ഷ്യത്തോടെ 205 കോടി രൂപയാണ് ഈ വര്‍ഷത്തെ ബജറ്റില്‍ വകയിരുത്തിയിരുന്നത്. എന്നാല്‍ കഴിഞ്ഞ മാസം 100 കോടി രൂപ ധനവകുപ്പ് സപ്ലൈകോയ്ക്ക് അനുവദിച്ചിരുന്നു. ഇതുകൂടാതെ 120 കോടി രൂപ കൂടി നല്‍കാനാണ് ധനവകുപ്പ് തീരുമാനിച്ചിരിക്കുന്നത്.

ഓണക്കാലത്തെ വിലക്കയറ്റം നിയന്ത്രിക്കുന്നതിനായി വിപണിയില്‍ കര്‍ശന പരിശോധനകള്‍ നടത്തുമെന്ന് അധികൃതര്‍ അറിയിച്ചിരുന്നു. റവന്യു, പോലീസ്, ലീഗല്‍ മെട്രോളജി, ഭക്ഷ്യസുരക്ഷ തുടങ്ങിയ വകുപ്പുകളുടെ മേല്‍ നോട്ടത്തില്‍ ജില്ലാ താലൂക്ക് സപ്ലൈ ഓഫീസര്‍മാര്‍, എ.ഡി.എം, ആര്‍.ഡി.ഒ, ലീഗല്‍ മെട്രോളജി ഉദ്യോഗസ്ഥര്‍ തുടങ്ങിയവരടങ്ങുന്ന സംഘം ഓരോ ജില്ലകളിലും സ്‌ക്വാഡുകളായി പരിശോധനകള്‍ നടത്തും.

The Kerala Finance Department has sanctioned ₹225 crore to SupplyCo to ensure adequate provisions and essentials for the upcoming Onam festival. This allocation aims to facilitate a smooth and joyful celebration of the state's iconic harvest festival