ഭോപ്പാല്‍: മദ്‌റസ ബോര്‍ഡിന് കീഴിലുള്ള സ്‌കൂളുകളിലും വിദ്യാഭ്യാസ സ്ഥാപനങ്ങളിലും അമുസ്‌ലിം കുട്ടികള്‍ പഠിക്കാന്‍ പാടില്ലെന്ന നിയമവുമായി ബി.ജെ.പി ഭരിക്കുന്ന മധ്യപ്രദേശ്. ഇത്തരം സ്ഥാപനളുടെ രജിസ്‌ട്രേഷന്‍ റദ്ദാക്കുമെന്നും മുന്നറിയിപ്പ് നല്‍കുന്നു. ഇത്തരം സ്ഥാപനങ്ങളില്‍ പഠിക്കുന്ന കുട്ടികളെ അവരുടെ മാതാപിതാക്കളുടെ സമ്മതത്തോടെ മാത്രമേ മതപഠനത്തിലും പ്രവര്‍ത്തനങ്ങളിലും പങ്കാളികളാക്കാവൂ എന്നും മധ്യപ്രദേശ് വിദ്യാഭ്യാസ വകുപ്പ് പുറപ്പെടുവിച്ച വിജ്ഞാപനത്തില്‍ പറയുന്നുണ്ട്. 

'അമുസ്‌ലിം സമുദായത്തില്‍പ്പെട്ട കുട്ടികളെ ചേര്‍ത്തതായി കണ്ടെത്തിയാല്‍ അവരുടെ ഗ്രാന്‍ഡുകള്‍ നിര്‍ത്തലാക്കുകയും രജിസ്‌ട്രേഷന്‍ റദ്ദാക്കുകയും ചെയ്യും' നോട്ടീസില്‍ പറയുന്നു. 

മദ്‌റസ ബോര്‍ഡിന് കീഴിലുള്ള സ്‌കൂളുകളില്‍ പഠിക്കുന്ന അമുസ്‌ലിം കുട്ടികളുടെ സര്‍വേ നടത്താനും സംസ്ഥാന സര്‍ക്കാര്‍ തീരുമാനിച്ചിട്ടുണ്ട്. ദേശീയ ബാലാവകാശ സംരക്ഷണ കമ്മീഷന്റെ (NCPCR) ശുപാര്‍ശയെ തുടര്‍ന്നാണ് ഈ നടപടി. കഴിഞ്ഞ ഏതാനും മാസങ്ങളായി അമുസ്‌ലിം കുട്ടികളെ മദ്‌റസ ബോര്‍ഡിന് കീഴിലുള്ള സ്‌കൂളുകളില്‍ ചേര്‍ത്തതിനെ ചൊല്ലി നിരവധി സംഘര്‍ഷങ്ങള്‍ മധ്യപ്രദേശില്‍ റിപ്പോര്‍ട്ട് ചെയ്തിരുന്നു.

കുട്ടികളുടെ എണ്ണം പെരുപ്പിച്ച് സംസ്ഥാന സര്‍ക്കാരില്‍ നിന്ന് കൂടുതല്‍ ഗ്രാന്‍ഡ് ലഭിക്കുന്നതിന് വേണ്ടിയാണ് അമുസ്‌ലിം കുട്ടികളെ ഈ വിദ്യാലയങ്ങളില്‍ ചേര്‍ക്കുന്നതെന്ന് ആരോപണം എന്‍.സി.പി.സി.ആര്‍ നേരത്തെ തന്നെ ഉന്നയിച്ചിരുന്നു. മധ്യപ്രദേശിലെ മദ്‌റസ ബോര്‍ഡിന് കീഴില്‍ പ്രവര്‍ത്തിക്കുന്ന സ്‌കൂളുകളില്‍ ചേരുന്ന കുട്ടികള്‍ മതപഠനത്തിലും പ്രവര്‍ത്തനങ്ങളിലും പങ്കെടുക്കാന്‍ നിര്‍ബന്ധിതരാവുകയാണെന്നും എന്‍സിപിസിആര്‍ ചെയര്‍മാന്‍ പ്രിയങ്ക് കനൂംഗോ ആരോപിച്ചിരുന്നു.

മധ്യപ്രദേശിലെ മദ്‌റസ ബോര്‍ഡിന് കീഴില്‍ പ്രവര്‍ത്തിക്കുന്ന സ്‌കൂളുകളില്‍ 9,000ത്തിലധികം ഹിന്ദു കുട്ടികള്‍ ചേര്‍ന്നതായാണ് ഈ വര്‍ഷം ജൂണിലെ എന്‍.സി.പി.സി.ആര്‍ റിപ്പോര്‍ട്ടില്‍ ഉള്ളത്. തുടര്‍ന്ന് സര്‍വേ നടത്താന്‍ മുഖ്യമന്ത്രിയായ മോഹന്‍ യാദവിനോട് കമ്മീഷന്‍ ആവശ്യപ്പെടുകയായിരുന്നു.

 The BJP-led government in Madhya Pradesh has implemented a new rule prohibiting non-Muslim students from attending madrasas and similar educational institutions.