ലഖ്നൗ: ഉത്തര്‍പ്രദേശില്‍ അധ്യാപകന്റെ ക്രൂരബലാത്സംഗത്തിനിരയായ 14 വയസുകാരി മരിച്ചു. സോണഭദ്ര ദുധി സ്വദേശിനിയായ കുട്ടി 20 ദിവസത്തോളം ആശുപത്രിയില്‍ ചികിത്സയില്‍ കഴിഞ്ഞ ശേഷം കഴിഞ്ഞ ചൊവ്വാഴ്ച്ചയാണ് മരിച്ചത്. 

സ്‌കൂളിലെ കായികാധ്യാപകനായ വിശ്വംഭര്‍ എന്നയാളാണ് കുട്ടിയെ ബലാത്സംഗം ചെയ്തതെന്നാണ് കുടുംബത്തിന്റെ പരാതി. ഇയാള്‍ ഒളിവിലാണ്. 

കഴിഞ്ഞ ഡിസംബറിലായിരുന്നു കേസിനാസ്പദമായ സംഭവം. സ്‌കൂളില്‍ നടന്ന കായികമത്സരത്തില്‍ പങ്കെടുക്കാനായി പെണ്‍കുട്ടിയെ വിളിച്ചുവരുത്തിയ പ്രതി കുട്ടിയെ ഇയാളുടെ വീട്ടിലേക്ക് കൂട്ടിക്കൊണ്ടുപോവുകയും ബലാത്സംഗത്തിനിരയാക്കുകയുമായിരുന്നു. 

വീട്ടിലെത്തിയ പെണ്‍കുട്ടി ആരോടും വിവരം പറഞ്ഞിരുന്നില്ല. പെണ്‍കുട്ടിയുടെ ആരോഗ്യനില വഷളായതോടെയാണ് കുടുംബം ഇക്കാര്യം അറിയുന്നത്. 

നാണക്കേടാകുമെന്ന് കരുതി കുട്ടിയുടെ കുടുംബവും സംഭവത്തില്‍ ആദ്യം പരാതി നല്‍കിയിരുന്നില്ല. ഇതിനിടെ, സംഭവം പുറത്തുപറയാതിരിക്കാന്‍ പ്രതിയായ വിശ്വംഭര്‍ 30,000 രൂപ കുടുംബത്തിന് നല്‍കിയിരുന്നു. എന്നാല്‍ കുട്ടിയുടെ ആരോഗ്യനില വഷളായതോടെ ജൂലൈ 10 ന് പിതാവ് പൊലിസില്‍ പരാതി നല്‍കി. തുടര്‍ന്ന് പോക്സോ വകുപ്പകളടക്കം ചുമത്തി വിശ്വംഭറിനെതിരേ പൊലിസ് കേസെടുക്കുകയായിരുന്നു.

കൊല്‍ക്കത്തയില്‍ വനിതാഡോക്ടറെ ബലാത്സംഗംചെയ്ത് കൊലപ്പെടുത്തിയതില്‍ രാജ്യവ്യാപകമായി പ്രതിഷേധം ശക്തമാകുന്നതിനിടെയാണ് ഉത്തര്‍പ്രദേശില്‍ ബലാത്സംഗത്തിനിരയായി പെണ്‍കുട്ടി മരിച്ച വാര്‍ത്തയും പുറത്തുവരുന്നത്.