ബംഗളൂരു: മൈസൂരു അർബൻ ഡെവലപ്‌മെന്റ് അതോറിറ്റി(മുഡ) ഭൂമി കൈമാറ്റത്തിൽ ക്രമക്കേട് നടന്നതായ ആരോപണത്തിൽ കർണാടക മുഖ്യമന്ത്രി സിദ്ധരാമയ്യയെ പ്രോസിക്യൂട്ട് ചെയ്യാൻ അനുമതി നൽകി ഗവർണർ താവർചന്ദ് ഗെലോട്ട്. ആക്ടിവിസ്റ്റുകളായ പ്രദീപ് കുമാർ, ടി.ജെ എബ്രഹാം, സ്‌നേഹമയി കൃഷ്ണ എന്നിവർ നൽകിയ പരാതികളിലാണ് നടപടി. 1988ലെ അഴിമതി നിരോധന നിയമത്തിലെ സെക്ഷൻ 17, 2023ലെ ഭാരതീയ നാഗരിക സുരക്ഷാ സംഹിത സെക്ഷൻ 218 എന്നിവ പ്രകാരം സിദ്ധരാമയ്യയെ പ്രോസിക്യൂട്ട് ചെയ്യാനാണ് ഗവർണർ അനുമതി നൽകിയത്.

അഴിമതി വിരുദ്ധ പ്രവർത്തകനായ ടി.ജെ എബ്രഹാം നൽകിയ പരാതിയിലാണ് ഗവർണർ സിദ്ധരാമയ്യയ്ക്ക് കാരണം കാണിക്കൽ നോട്ടിസ് നൽകിയത്. മുഡയിലെ ക്രമക്കേടിൽ സിദ്ധരാമയ്യയെ പ്രോസിക്യൂട്ട് ചെയ്യണമെന്നായിരുന്നു ആവശ്യം. കോടിക്കണക്കിന് രൂപയുടെ അഴിമതി സംസ്ഥാന ഖജനാവിന് വൻ നഷ്ടമുണ്ടാക്കിയെന്നും പരാതിയിൽ ആരോപിച്ചിരുന്നു.

സിദ്ധരാമയ്യയ്ക്കു പുറമേ, ഭാര്യ ബി.എം പാർവതി, മകൻ എസ്. യതീന്ദ്ര, മൂഡയിലെ മുതിർന്ന ഉദ്യോഗസ്ഥർ എന്നിവർക്കെതിരെയാണ് പരാതി. അഴിമതിയിൽ സിദ്ധരാമയ്യയ്ക്കും ഭാര്യ്ക്കും ഉദ്യോഗസ്ഥർക്കും പങ്കുണ്ടെന്നാണ് ആക്ടിവിസ്റ്റ് സ്‌നേഹമയി കൃഷ്ണയുടെ ആരോപണം.

ഗവർണറുടെ നടപടിയെ ബി.ജെ.പി സ്വാഗതം ചെയ്തു. എന്നാൽ മുൻ മുഖ്യമന്ത്രി എച്ച്.ഡി കുമാരസ്വാമിക്കും മന്ത്രിമാർക്കുമെതിരായ അന്വേഷണത്തിൽ ഗവർണറുടെ നടപടി വൈകുമ്പോൾ മുഖ്യമന്ത്രി സിദ്ധരാമയ്യയ്‌ക്കെതിരായ അടിസ്ഥാനരഹിതമായ പരാതിയിൽ ഗവർണർ അതിവേഗത്തിലാണ് പ്രവർത്തിച്ചതെന്നും ഇത് രാഷ്ട്രീയ പ്രേരിത ഗൂഢാലോചനയാണെന്ന് സംശയിക്കുന്നുവെന്നും കോൺഗ്രസ് ആരോപിച്ചു.

കോടതിയിൽ നേരിടും: സിദ്ധരാമയ്യ 

ബംഗളൂരു: തന്നെ പ്രോസിക്യൂട്ട് ചെയ്യാൻ ഗവർണർ അനുമതി നൽകിയത് ഭരണഘടനാ വിരുദ്ധമെന്ന് കർണാടക മുഖ്യമന്ത്രി സിദ്ധരാമയ്യ. ഗവർണറുടെ തീരുമാനം നിയമത്തിനെതിരാണെന്നും ഈ നീക്കത്തെ കോടതിയിൽ നേരിടുമെന്നും സിദ്ധരാമയ്യ പറഞ്ഞു. രാജിവയ്‌ക്കേണ്ട കുറ്റമൊന്നും താൻ ചെയ്തിട്ടില്ല. മന്ത്രിസഭയും ഹൈക്കമാൻഡും എം.എൽ.എമാരും എം.പിമാരും തന്നോടൊപ്പമുണ്ടെന്നും സിദ്ധരാമയ്യ മാധ്യമപ്രവർത്തകരോട് പറഞ്ഞു.

Karnataka Governor Thawarchand Gehlot grants permission to prosecute Chief Minister Siddaramaiah in connection with alleged corruption in a Mysuru Urban Development Authority land transfer case. The complaint, filed by activists, accuses Siddaramaiah and his family of illegal land acquisition.