തിരുവനന്തപുരം: കേരളത്തെ ഞെട്ടിച്ച വയനാട് ഉരുൾപൊട്ടൽ ദുരന്ത ബാധിതരുടെ സാമ്പത്തിക ബാധ്യത ഉൾപ്പെടെയുള്ള കാര്യങ്ങളിൽ സുപ്രധാന തീരുമാനമെടുക്കാൻ സംസ്ഥാന തല ബാങ്കേഴ്സ് സമിതി ഇന്ന് യോഗം ചേരും. തിരുവനന്തപുരത്ത് നടക്കുന്ന യോഗത്തിൽ വിവിധ ബാങ്ക് പ്രതിനിധികൾ പങ്കെടുക്കും. ദുരിത ബാധിതരുടെ സാമ്പത്തിക ബാധ്യതകളിൽ മനുഷ്യത്വപരമായ സമീപനം വേണമെന്ന ആവശ്യം ഉയരുന്ന പശ്ചാത്തലത്തിലാണ് യോഗം. മൊറൊട്ടോറിയം ഏർപ്പെടുത്തണമെന്ന ആവശ്യവും ശക്തമാണ്.

ഉരുൾപൊട്ടലിൽ ഈടും വസ്തുവകകളും നഷ്ടമായവരുടെ ബാധ്യതകൾ എഴുതിത്തള്ളുകയോ വായ്പകൾക്ക് മൊറൊട്ടോറിയം ഏർപ്പെടുത്തുകയോ ചെയ്യണമെന്ന് ആവശ്യത്തിൽ ബാങ്കുകൾ തീരുമാനമെടുത്തേക്കും. എല്ലാ ബാങ്കുകളുടെയും ഉന്നത അധികാരികൾ യോഗത്തിൽ പങ്കെടുക്കും. 

ഇതിനിടെ, ദുരിത ബാധിതരുടെ അക്കൗണ്ടുകളിൽ നിന്ന് ബാങ്കുകൾ ഉൾപ്പെടെയുള്ള ധനകാര്യ സ്ഥാപനങ്ങൾ ഇ.എം.ഐ ഈടാക്കുന്നത് ഉൾപ്പെടെയുള്ള നടപടികൾ വലിയ വിമർശനത്തിനും ഇടയാക്കിയിട്ടുണ്ട്. അടിയന്തര സഹായമായി സർക്കാർ ദുരിതബാധിതർക്ക് നൽകിയ 10,000 രൂപയിൽ നിന്ന് 5,000 രൂപ വരെ പലരിൽ നിന്നും ബാങ്ക് പിടിച്ചിരുന്നു. ഇങ്ങനെ ബാങ്കുകൾ പിടിച്ചെടുത്ത മാസതവണകൾ തിരിച്ച് നൽകാനുള്ള തീരുമാനവും യോഗത്തിൽ പ്രതീക്ഷിക്കുന്നുണ്ട്. 

അതേസമയം, വയനാട്ടിലെ ഉരുൾപൊട്ടൽ ദുരന്തബാധിതരിൽ നിന്ന് ഗ്രാമീൺ ബാങ്ക് പിടിച്ച പണം തിരികെ നൽകും. ബാങ്കേഴ്സ് സമിതി ജനറൽ മാനേജർ കെ.എസ് പ്രദീപ് ആണ് ഇക്കാര്യം വ്യക്തമാക്കിയത്.

A high-level meeting of the State Level Bankers' Committee (SLBC) will be held in Thiruvananthapuram today to discuss relief measures for the victims of the recent Wayanad landslide in Kerala