വയനാട്: പൂക്കോട് വെറ്ററിനറി സര്‍വ്വകലാശാലയില്‍ പുതിയ വിസിയായി മണ്ണുത്തി വെറ്ററിനറി കോളജിലെ ലൈവ്‌സ്റ്റോക്ക് വിഭാഗം പ്രൊഫസറായ ഡോ. കെ എസ് അനിലിനെ നിയമിച്ചു. താല്‍ക്കാലിക ചുമതലയാണ് കൈമാറിയത്. ശ്രീനാരായണ യൂണിവേഴ്‌സിറ്റിയിലും പുതിയ വൈസ് ചാന്‍സിലറെ ചുമതലപ്പെടുത്തിയിട്ടുണ്ട്.

കുസാറ്റ് മാനേജ്‌മെന്റ് സ്റ്റഡീസ് വിഭാഗം ഡയറക്ടറായ ഡോ. വി.പി ജഗതി രാജിന് ആണ് താല്‍ക്കാലിക ചുമതല. ഇന്നലെയാണ് ഗവര്‍ണര്‍ ചുമതലപ്പെടുത്തിയ പൂക്കോട് സര്‍വകലാശാലയിലെ വി.സി ഡോ.പി.സി ശശീന്ദ്രന്‍ രാജി വെച്ചത്.  അതേസമയം, വ്യക്തിപരമായ കാരണങ്ങളാൽ രാജിവെക്കുന്നുവെന്നാണ് പി.സി ശശീന്ദ്രൻ പ്രതികരിച്ചത്. സിദ്ധാർത്ഥന്റെ മരണവുമായി ബന്ധപ്പെട്ട് മുൻ വി.സി എം.ആർ ശശീന്ദ്രനാഥിനെ മാറ്റിയിരുന്നു. ഇതിനുശേഷമാണ് പി.സി ശശീന്ദ്രൻ ചുമതലയേറ്റത്.