കോഴിക്കോട്: വിവിധ മേഖല ഓഫിസുകളില്‍ നിന്ന് വായ്പ എടുത്ത് കുടിശികയായവര്‍ക്ക് ഒറ്റത്തവണ തീര്‍പ്പാക്കല്‍ പദ്ധതിയുമായി സംസ്ഥാന ന്യൂനപക്ഷ ധനകാര്യ കോര്‍പറേഷൻ. ഇതാദ്യമായാണ് കോര്‍പറേഷന്‍ ഒറ്റത്തവണ തീര്‍പ്പാക്കല്‍ പദ്ധതി അവതരിപ്പിക്കുന്നത്. ഇന്ന് മുതല്‍ പദ്ധതി പ്രാബല്യത്തില്‍ വരും.

പലിശയും പിഴപ്പലിശയും പൂര്‍ണമായും ഒഴിവാക്കിയും 70 ശതമാനം വരെ കിഴിവോടു കൂടിയും ബാധ്യത ഒഴിവാക്കാനുള്ള അവസരമാണ് ഇതുവഴി വായ്പ എടുത്തവര്‍ക്ക് ലഭിക്കുക. വായ്പക്കാരന്‍ മരണപ്പെട്ട വായ്പയ്ക്ക് (രണ്ടു ലക്ഷം വരെ) പലിശയും പിഴപ്പലിശയും പൂര്‍ണമായും ഒഴിവാക്കും. രണ്ട് ലക്ഷത്തിനു മുകളിലുള്ള വായ്പയുടെ പലിശയില്‍ 50 ശതമാനം ഇളവ് നല്‍കും. മാരകരോഗം ബാധിച്ചവര്‍ക്കും പദ്ധതി വഴി ഇളവ് അനുവദിക്കും. ഇത്തരം വായ്പകളുടെ പലിശയില്‍ 50 ശതമാനം  കുറവ് ലഭിക്കും. രണ്ട് ലക്ഷത്തിനുമുകളിലുള്ള വായ്പയ്ക്ക് 25 ശതമാനം ഇളവ് ലഭിക്കും. അപകടം സംഭവിച്ച് തൊഴിലെടുക്കാനാകാത്ത വിധം കിടപ്പിലായവര്‍ക്കും ആനുകൂല്യത്തിന് അര്‍ഹതയുണ്ടാകും.

പ്രകൃതി ദുരന്തത്തില്‍പ്പെട്ട് കൃഷി, ഭവനം, കച്ചവടം തുടങ്ങിയവ നഷ്ടപ്പെട്ടവര്‍ക്കും ഒത്തവണ തീര്‍പ്പാക്കല്‍ പദ്ധതിയില്‍ ഇളവ് അനുവദിക്കും. പശുവളര്‍ത്തല്‍, കോഴി വളര്‍ത്തല്‍ തുടങ്ങിയ പദ്ധതികള്‍ക്കായി വായ്പ എടുക്കുകയും പിന്നീട് രോഗമോ മറ്റോ വന്ന് നശിക്കുകയും ചെയ്തിട്ടുണ്ടെങ്കിൽ പിഴപ്പലിശയില്‍ 70 ശതമാനം വരെ കിഴിവാണ് ലഭിക്കുക. അഗ്‌നിബാധ, പകര്‍ച്ചവ്യാധി തുടങ്ങിയവ മൂലം നിലച്ചുപോയ വ്യാപാര സ്ഥാപനങ്ങള്‍ക്കും പിഴപ്പലിശയിനത്തില്‍ 70 ശതമാനം വരെ കുറവ് ലഭിക്കും.

കോര്‍പറേഷന്റെ മേഖല ഓഫിസുകളില്‍ അദാലത്ത് കമ്മിറ്റികള്‍ രൂപീകരിച്ചാകും പദ്ധതി നടപ്പിലാക്കുക. വായ്പാ തിരിച്ചടവിന് ആവശ്യമായ സമയം അനുവദിക്കാനുള്ള അധികാരവും കമ്മിറ്റിക്കുണ്ടാകും. കുടിശിക വരുത്തിയവര്‍ പദ്ധതി ഉപയോഗപ്പെടുത്തണമെന്നും ഇതിനായി എല്ലാ മേഖല ഓഫിസുകളിലും പ്രത്യേകം സംവിധാനം ഏര്‍പ്പെടുത്തിയതായും  ചെയര്‍മാന്‍ സ്റ്റീഫന്‍ ജോര്‍ജ്, മാനേജിങ് ഡയരക്ടര്‍ സി. അബ്ദുല്‍ മുജീബ് എന്നിവര്‍ അറിയിച്ചു.

The Kerala Minority Finance Corporation launches its first-ever one-time settlement scheme, offering significant interest waivers and reductions on outstanding loans to provide relief for borrowers facing financial hardships.