കല്ലടിക്കോട്: പാലക്കാട്-കോഴിക്കോട് ദേശീയ പാതയില്‍ മണ്ണാര്‍ക്കാടു നിന്നും പാലക്കാട്ടേക്ക് വരികയായിരുന്ന സ്വകാര്യ ബസ് അപകടത്തില്‍പെട്ടു. കല്ലടിക്കോട് പഞ്ചായത്ത് ഗ്രൗണ്ടിനുസമീപം സ്വകാര്യവ്യക്തിയുടെ വീടിനോട് ചേര്‍ന്നാണ് ബസ് മറിഞ്ഞത്. വളവ് തിരിയുന്നതിനിടെ നിയന്ത്രണം വിട്ടാണ് ബസ് മറിഞ്ഞതെന്ന് ദൃക്‌സാക്ഷികള്‍ പറയുന്നു.
40 യാത്രക്കാരായിരുന്നു അപകടസമയത്ത് ബസിലുണ്ടായിരുന്നത്. അപകടത്തില്‍ പതിനഞ്ചു യാത്രക്കാര്‍ക്ക് നിസാര പരുക്കു പറ്റി. അപകട സമയത്ത് ചാറ്റല്‍ മഴയുള്ളതു കൊണ്ടാണ് വളവില്‍ ബ്രേക്ക് ചവിട്ടിയതിനെതുടര്‍ന്ന് ബസ് നിയന്ത്രണം വിട്ടത്.
അപകടം നടന്നത്  അല്‍പ്പം മാറി മുന്നോട്ടായിരുന്നുവെങ്കില്‍ വന്‍ദുരന്തമാകുമായിരുന്നു. സംഭവം നടന്നയുടന്‍ ഓടിക്കൂടിയ നാട്ടുകാര്‍ പിന്‍ഭാഗത്തെ ഗ്ലാസ് തകര്‍ത്ത് യാത്രക്കാരെ പുറത്തെടുത്തു.
പരുക്കേറ്റവരെ സമീപത്തുള്ള സ്വകാര്യ ആശുപത്രിയില്‍ ചികിത്സ തേടി.