ത്യശൂര്‍: ചാലക്കുടി നഗരസഭ ജീവനക്കാരന്‍ സിജുവിന്റെ ബാങ്ക് അക്കൗണ്ടിലേക്ക് രണ്ടു തവണയായി 40,000 രൂപ വീതം 80,000 രൂപയാണ് ഗൂഗിള്‍ പേ വഴി കയറിയത്. പൈസ കയറിയതറിഞ്ഞ് ഞെട്ടിയ സിജു ഉടനെ സമീപത്തുള്ള ബാങ്കിലേക്കോടി. തുടര്‍ന്ന് ബാങ്ക് ഉദ്യോഗസ്ഥര്‍ പണം കയറിയ നമ്പറില്‍ വിളിച്ച് വിവരം തിരക്കിയപ്പോഴാണ് കാര്യങ്ങള്‍ അറിയുന്നത്. ഒഡിഷയിലുള്ള കുടുംബം മകളുടെ വിവാഹത്തിനായി മാറ്റിവച്ചിരുന്ന പണമാണ് നമ്പര്‍ മാറി സിജുവിന്റെ നമ്പറിലേക്ക് അയച്ചത്.

പണം തെറ്റായ നമ്പറിലേക്കാണ് അയച്ചതെന്ന് ബോധ്യപ്പെട്ടതിനെ തുടര്‍ന്ന് ഒഡിഷയിലെ ബാങ്കില്‍ വിവരമറിയിക്കാന്‍ അവരോട് ബാങ്ക് അധികൃതര്‍ ആവശ്യപ്പെട്ടു. അങ്ങനെ അവര്‍ ബാങ്കില്‍ ബന്ധപ്പെട്ടതിനെ തുടര്‍ന്ന് ഒഡിഷയിലെ ബാങ്ക് അധിക്യതര്‍ ചാലകുടി എസ്ബിഐ ശാഖയില്‍ വിവരം അറിയിച്ചു. തുടര്‍ന്ന് ബാങ്ക് അക്കൗണ്ട് വഴി പൈസ അയച്ചാല്‍ മതിയെന്ന് ബാങ്ക് മാനേജര്‍ സിജുവിനോട് പറഞ്ഞുവെങ്കിലും ബാങ്ക് സമയം കഴിഞ്ഞതിനാല്‍ പണം അയക്കാന്‍ സാധിച്ചില്ല. ബാങ്ക് സമയം കഴിഞ്ഞതിനാല്‍ ചൊവാഴ്ച പണം തിരിച്ചയക്കുമെന്ന് സിജു പറഞ്ഞു.