ദുബൈ: റോഡ്‌സ് ആന്‍ഡ് ട്രാന്‍സ്‌പോര്‍ട് അതോറിറ്റി (ആര്‍.ടി.എ) മെട്രോ സ്റ്റേഷനുകളെ ബന്ധിപ്പിച്ച് നാല് പുതിയ ബസ് റൂട്ടുകള്‍ക്ക് രൂപം നല്‍കി. വെള്ളിയാഴ്ച മുതല്‍ ഈ റൂട്ടുകളില്‍ സര്‍വിസ് തുടങ്ങും. റൂട്ട് 31 പിന്‍വലിച്ച് എഫ് 39, എഫ് 40 എന്നിവയും  റൂട്ട് എഫ് 56 മാറ്റി എഫ് 58, എഫ് 59 എന്നിവയുമാണ് പുതുതായി തുടങ്ങുന്നത്. 30 മിനിറ്റ് ഇടവേളയിലായിരിക്കും സര്‍വിസ് നടത്തുക. 

എഫ് 39: ഇത്തിസാലാത്ത് മെട്രോ സ്റ്റേഷനില്‍ നിന്ന് ഊദ് അല്‍ മുത്തീന റൗണ്ട് എബൗട്ട് സ്റ്റോപ്പ് ഒന്നിലേക്കും തിരിച്ചും.
എഫ് 40: ഇത്തിസാലാത്ത് മെട്രോ സ്റ്റേഷനില്‍ നിന്ന് മിര്‍ദിഫ് സ്ട്രീറ്റ് 78 ലേക്കും തിരിച്ചും.
എഫ് 58: അല്‍ ഖൈല്‍ മെട്രോ സ്റ്റേഷനില്‍ നിന്ന് ദുബൈ  ഇന്റര്‍നെറ്റ് സിറ്റി മെട്രോ സ്റ്റേഷനിലേക്ക്.
എഫ് 59: ദുബൈ ഇന്റര്‍നെറ്റ് സിറ്റി മെട്രോ സ്റ്റേഷനില്‍ നിന്ന് ദുബൈ നോളജ് വില്ലേജിലേക്കും തിരിച്ചും.

മറ്റ് റൂട്ടുകളിലെ മാറ്റങ്ങള്‍
റൂട്ട് 21 നെ 21 എ, 21 ബി എന്നിങ്ങനെ ആയി വിഭജിച്ചു. 21 എ അല്‍ ഖൂസ് ക്ലിനിക്കല്‍ പാത്തോളജി സര്‍വിസ് ബസ് സ്റ്റോപ്പ് 1 മുതല്‍ അല്‍ ഗുബൈബ ബസ് സ്റ്റേഷന്‍ വരെയും, 21 ബി തിരിച്ചും സര്‍വിസ് നടത്തും.

റൂട്ട് 61 ഡി 66 മായി ലയിപ്പിച്ചു. റൂട്ട് 95 നെ 95 എ യുമായി ലയിപ്പിച്ചിട്ടുണ്ട്. ഇതോടെ, റൂട്ട് 95 ഉപയോഗിക്കുന്നവര്‍ക്ക് എക്‌സ് 92ലേക്ക് കണക്റ്റിവിറ്റി ലഭിക്കും.
അല്‍ ഗുബൈബ സ്റ്റേഷനില്‍ നിന്ന് ഊദ് മേത്തയിലേക്കുള്ള സെക്ടര്‍ റദ്ദാക്കിയ സാഹചര്യത്തില്‍, റൂട്ട് 6 ഊദ് മേത്ത മെട്രോ സ്റ്റേഷനില്‍ നിന്ന് ഹെല്‍ത്ത് കെയര്‍ സിറ്റിയിലേക്ക് പരിമിതപ്പെടുത്തി.

റൂട്ട് 99 ഇനി മുതല്‍ ജാഫ്‌സ 1 വരെ സര്‍വിസ് നടത്തും.
എഫ് 31ല്‍ ദി ഗ്രീന്‍സിലെ സ്റ്റോപ്പുകള്‍ ഉള്‍പ്പെടുത്തി.
എഫ് 45നോട് അല്‍ ഫുര്‍ജാന്‍ സ്റ്റോപ്പ് കൂട്ടി ചേര്‍ത്തു. ജാഫ്‌സ 1 എന്ന സ്റ്റോപ്പ് എഫ് 54ല്‍ നിന്ന് മാറ്റി.

ഫുജൈറയിലേക്കുള്ള ഇ 700 ഇന്റര്‍ സിറ്റി ബസ് ഇനി മുതല്‍ യുനിയന്‍ ബസ് സ്റ്റേഷന് പകരം ഇത്തിസാലാത്ത് ബസ് സ്റ്റേഷനില്‍ നിന്ന് പുറപ്പെടും.
35 റൂട്ടുകളിലെ സര്‍വിസിന്റെ സമയ നിഷ്ഠ ഉറപ്പ് വരുത്തുമെന്നും ആര്‍.ടി.എ അധികൃതര്‍ അറിയിച്ചു.