റിയാദ് സീസണിന്റെ അഞ്ചാമത് പതിപ്പ് 2024 ഒക്ടോബർ 12 മുതൽ ആരംഭിക്കുമെന്ന് സഊദി ജനറൽ എന്റർടൈൻമെന്റ് അതോറിറ്റി (GEA) അറിയിച്ചു. 2024 ഓഗസ്റ്റ് 28-നാണ് അധികൃതർ ഇത് സംബന്ധിച്ച അറിയിപ്പ് നൽകിയത്.

ഇതുമായി ബന്ധപ്പെട്ട് നടത്തിയ പ്രത്യേക പത്രസമ്മേളനത്തിൽ  സഊദി ജനറൽ എന്റർടൈൻമെന്റ് അതോറിറ്റി  ചെയർമാൻ തുർക്കി അൽ ഷെയ്ഖ് റിയാദ് സീസണിന്റെ അഞ്ചാമത് പതിപ്പ് സംബന്ധിച്ച വിവരങ്ങൾ പങ്ക് വെച്ചു.

ഏറെ പുതുമകളോടെയാണ് റിയാദ് സീസൺ 2024 ഒരുക്കുന്നതെന്ന് തുർക്കി അൽ ഷെയ്‌ഖ് പറഞ്ഞു.പശ്ചിമേഷ്യന്‍ പ്രദേശങ്ങളിൽ സംഘടിപ്പിക്കപ്പെടുന്ന ഏറ്റവും വലിയ വിനോദ പരിപാടികളിലൊന്നായ റിയാദ് സീസണിന്റെ ഇത്തവണത്തെ പതിപ്പിൽ 14 വ്യത്യസ്ത വിനോദ മേഖലകൾ ഉൾപ്പെടുത്തുമെന്ന് അദ്ദേഹം വ്യക്തമാക്കി. ഇതിന് പുറമെ 11 ലോക ചാമ്പ്യൻഷിപ്പുകൾ, 10 എക്സിബിഷനുകൾ എന്നിവയും റിയാദ് സീസണിന്റെ ഭാഗമായി നടത്തപ്പെടും.

7.2 ദശലക്ഷം സ്‌ക്വയർ മീറ്ററിലാണ് ഇത്തവണത്തെ മേള അണിയിച്ചോരുക്കുന്നതെന്ന് അദ്ദേഹം അറിയിച്ചു. ലോകത്തിന്റെ നാനാഭാഗങ്ങളിൽ നിന്നുള്ള വിനോദ അനുഭവങ്ങൾ സന്ദർശകർക്ക് മുന്നിലെത്തിക്കുന്ന രീതിയിലാണ് ഈ മേള സംഘടിപ്പിക്കുന്നത്.

സഊദി എയർലൈൻസുമായി ചേർന്ന് കൊണ്ട് ഒരുക്കുന്ന ‘ബുലവാർഡ് റൺവേ’ എന്ന പുതിയ വിനോദ മേഖല ഇത്തവണത്തെ ഒരു പ്രത്യേകതയാണ്. ഡീക്കമ്മീഷൻ ചെയ്ത ഒരു വിമാനം ഉപയോഗിച്ചാണ് ഈ സോൺ ഒരുക്കുന്നത്.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക