കോഴിക്കോട്: മുതിര്‍ന്ന സി.പി.എം നേതാവും ദേശാഭിമാനി മുന്‍ പത്രാധിപരുമായിരുന്ന വി.വി ദക്ഷിണാമൂര്‍ത്തി (82) അന്തരിച്ചു. വാര്‍ധക്യസഹജമായ രോഗങ്ങളെ തുടര്‍ന്ന് ജില്ലാ സഹകരണ ആശുപത്രിയില്‍ ഒരു മാസമായി ചികില്‍സയിലായിരുന്നു ദക്ഷിണാമൂര്‍ത്തി. ഉച്ച കഴിഞ്ഞ് മൂന്നു മണിയോടെയായിരുന്നു അന്ത്യം.

പേരാമ്പ്ര സ്വദേശിയാണ്. മൂന്നു തവണ നിയമസഭയിലേക്ക് തെരഞ്ഞെടുക്കപ്പെട്ടു. ദീര്‍ഘകാലം ദേശാഭിമാനിയുടെ കൊച്ചി യൂണിറ്റ് മാനേജറായിരുന്നു. 1934ല്‍ പനക്കാട്ടാണ് ജനനം. അച്ഛന്‍ പരേതനായ ടി.ആര്‍ വാര്യര്‍. അമ്മ: പരേതയായ നാരായണി വാരസ്യാര്‍. ഭാര്യ: റിട്ട. അധ്യാപിക ടി.എം നളിനി, മക്കള്‍: മിനി (മാനിപുരം എ.യു.പി സ്‌കൂളിലെ അധ്യാപിക), അജയകുമാര്‍ (അധ്യാപകന്‍, വെള്ളിമാട്കുന്ന് ജെ.ഡി.ടി ഇസ്‌ലാം പോളിടെക്‌നിക്), ആര്‍.പ്രസാദ് (ദേശാഭിമാനി മലപ്പുറം യൂണിറ്റ് മാനേജര്‍).