ചേളാരി: സമസ്ത കേരള ഇസ് ലാം മത വിദ്യാഭ്യാസ ബോര്‍ഡിന് കീഴില്‍ 2019 ല്‍ തുടക്കം കുറിച്ച ഫാളില -ഫളീല കോഴ്‌സിന്റെ പ്രഥമബാച്ചിന്റെ സനദ് ദാന സമ്മേളനം പ്രൗഢമായി. കൗണ്‍സില്‍ ഓഫ് സമസ്ത വിമണ്‍സ് കോളജസ് (സി.എസ്.ഡബ്ല്യു.സി)ന്റെ കീഴില്‍ 218 വിദ്യാര്‍ഥികളാണ് ഈ വര്‍ഷം കോഴ്‌സ് പൂര്‍ത്തീകരിച്ചത്. ചേളാരി സെഞ്ച്വറി ഓഡിറ്റോറിയത്തില്‍ സമസ്ത കേരള ജംഇയ്യതുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങളില്‍ നിന്ന് രക്ഷിതാക്കള്‍ സനദ് ഏറ്റുവാങ്ങി.

സമ്മേളനം പാണക്കാട് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്തു. ആത്മീയ ചിന്തയുള്ള സമൂഹത്തെ വാര്‍ത്തെടുക്കാന്‍ സമസ്തയുടെ ഫാളില- ഫളീലയിലൂടെ സാധിക്കുമെന്ന് അബ്ബാസലി തങ്ങള്‍ പറഞ്ഞു.
സെക്രട്ടറി പ്രൊഫ.കെ ആലിക്കുട്ടി മുസ്ലിയാര്‍ അവാര്‍ഡ് ദാനം നടത്തി. സമസ്ത കേരള ഇസ്ലാം മത വിദ്യാഭ്യാസ ബോര്‍ഡ് പ്രസിഡന്റ് പി.കെ മൂസക്കുട്ടി ഹസ്രത്ത് സി.എസ്.ഡബ്ല്യു.സി മുഖ്യ വെബ് സൈറ്റ് ലോഞ്ചിങ് നടത്തി. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി തങ്ങള്‍ പ്രാര്‍ഥനക്ക് നേതൃത്വം നല്‍കി.

സി.എസ്.ഡബ്ല്യു.സി ചെയര്‍മാന്‍ എം.ടി.അബ്ദുല്ല മുസ്ലിയാര്‍ അധ്യക്ഷനായി. സി.എസ്.ഡബ്ല്യു.സി ജനറല്‍ കണ്‍വീനര്‍ അബ്ദുസമദ് പൂക്കോട്ടൂര്‍ സ്വാഗതം പറഞ്ഞു. സമസ്ത സെക്രട്ടറി കെ.ഉമര്‍ ഫൈസി മുക്കം, എസ്.കെ.ജെ.എം.സി.സി പ്രസിഡന്റ് ഡോ.ബഹാഉദ്ദീന്‍ മുഹമ്മദ് നദ്വി, സമസ്ത കേരള ജംഇയ്യതുല്‍ മുദരിസീന്‍ ജ.സെക്രട്ടറി എ.വി അബ്ദുറഹിമാന്‍ മുസ്ലിയാര്‍, സമസ്ത കേന്ദ്ര മുശാവറ അംഗം ഡോ.സി.കെ അബ്ദുറഹ്‌മാന്‍ ഫൈസി, അക്കാദമിക് ചെയര്‍മാന്‍ പ്രൊഫ.ഡോ.എന്‍.എ.എം.അബ്ദുല്‍ ഖാദര്‍, എസ്.വൈ.എസ് സംസ്ഥാന വര്‍ക്കിങ് സെക്രട്ടറി അബ്ദുല്‍ ഹമീദ് ഫൈസി അമ്പലക്കടവ്, സമസ്ത കേരള ഇസ് ലാം മത വിദ്യഭ്യാസ ബോര്‍ഡ് ജനറല്‍ മാനേജര്‍ കെ.മോയിന്‍കുട്ടി മാസ്റ്റര്‍, കെ.എം അബ്ദുല്ല മാസ്റ്റര്‍ കൊട്ടപ്പുറം, സിദ്ധീഖ് നദ്വി ചേറൂര്, എം.ടി അബൂബക്കര്‍ ദാരിമി, മൊയ്തീന്‍ ഫൈസി ചെമ്മാണിയോട്, നിസാം ഒളവട്ടൂര്‍, നൗഫല്‍ ഹുദവി, സി.എസ്.ഡബ്ല്യു.സി കോ ഓഡിനേറ്റര്‍ സഹദ് ഫൈസി അല്‍ ബുര്‍ഹാനി, അസിസ്റ്റന്റ് കോ ഓഡിനേറ്റര്‍ മുബശ്ശിര്‍ ഫൈസി സംസാരിച്ചു.

ഫളീല പ്രഥമ സനദ് ദാനം സമസ്ത പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങള്‍ നിര്‍വഹിക്കുന്നു