കഴിഞ്ഞ ദിവസം രാത്രി മണിപ്പൂർ മുൻ ചീഫ് സെക്രട്ടറി ഒയ്നാം നാബകിഷോറിന്റെ വീട് തീവ്രവാദികൾ ബോംബെറിഞ്ഞ് തകർത്തു. ബിഷ്ണുപൂരിൽ വീട് ആക്രമണ സമയത്ത് മുൻ ചീഫ് സെക്രട്ടറി ഇല്ലാത്തതിനാൽ വൻ അപകടമാണ് ഒഴിവായത്. സംഭവങ്ങൾക്ക് പിന്നിൽ ആരോപണ പ്രത്യരോപണങ്ങളുമായി കുക്കി, മെയ്തി വിഭാഗങ്ങൾ രംഗത്തെത്തി. സംസ്ഥാനത്ത് സംഘർഷങ്ങൾക്കും വിവിധ ആക്രമണങ്ങൾക്കുമായി തീവ്രവാദ ഗ്രൂപ്പുകാർ വൻതോതിൽ ആയുധ ശേഖരം നടത്തി വരുന്നതായി സംസ്ഥാന ഇന്റലിജൻസ് വിഭാഗം സർക്കാറിന് മുന്നറിയിപ്പ് നൽകി.

വരാനിരിക്കുന്ന ദിവസങ്ങളിൽ ജാഗ്രത പുലർത്തണമെന്ന് സൈന്യവും പറഞ്ഞു. ഇതിനിടെ അതിർത്തി പ്രദേശങ്ങളിൽ നിന്ന് അസം റൈഫിൾസിനെ നീക്കി സി.ആർ.പി.എഫിന്റെ രണ്ട് ബറ്റാലിയനുകളെ വിന്യസിച്ചത് വൻ പ്രത്യാഖ്യാതം ഉണ്ടാക്കുമന്ന് കുക്കി സംഘടനകൾ പറഞ്ഞു. രാജ്യാതിർത്തിയിൽ വേലികെട്ടാനുള്ള നടപടികൾ ആരംഭിച്ചതായി കേന്ദ്രസർക്കാരും വ്യക്തമാക്കി.