വെട്ടത്തൂര്‍: ഗവ.ഹയര്‍ സെക്കന്‍ഡറി സ്‌കൂള്‍ പൂര്‍വവിദ്യാര്‍ഥി കൂട്ടായ്മ സംഘടിപ്പിക്കുന്ന ഗുരുവന്ദനം നാലിന് രാവിലെ 9.30 മുതല്‍ വൈകീട്ട് മൂന്നു വരെ സ്‌കൂള്‍ ഓഡിറ്റോറിയത്തില്‍ നടക്കും.
വിദ്യാലയാരംഭം മുതല്‍ സേവനം ചെയ്തു സര്‍വീസില്‍ നിന്നും വിരമിച്ച അധ്യാപകരെയാണ് ആദരിക്കുന്നത്. 1974ല്‍ ആണ് സ്‌കൂള്‍ തുടങ്ങിയത്. അന്നത്തെ ഹെഡ്മിസ്ട്രസ് ടി.ജെ അബ്രഹാം മാസ്റ്റര്‍ ഉള്‍പ്പെടെയുള്ള അധ്യാപകര്‍ പങ്കെടുക്കും. രാവിലെ 10ന് ആദ്യ എസ്.എസ്.എല്‍.സി ബാച്ചിലെ വിദ്യാര്‍ഥിനിയും വെട്ടത്തൂര്‍ ഗ്രാമപഞ്ചായത്തിന്റെ പ്രസിഡന്റും ഒരുമ ചെയര്‍പേഴ്‌സനുമായ അന്നമ്മ വള്ളിയാംതടത്തില്‍ ഗുരുവന്ദനം ഉദ്ഘാടനം ചെയ്യും.
    ഒരുമ വര്‍ക്കിങ് ചെയര്‍മാന്‍ എം ഗോപാലന്‍ അധ്യക്ഷനാകും. ഒരുമയുടെ ലോഗോ പ്രകാശനം ഡോ. ടി.യു ഷബീറലി സ്‌കൂള്‍ പ്രിന്‍സിപ്പല്‍ കെ അബ്ദുല്‍ കരീമിന് നല്‍കി പ്രകാശനം നിര്‍വഹിക്കും. എസ്.എസ്.എല്‍.സി, പ്ലസ്ടു പരീക്ഷകളില്‍ മികച്ച വിജയം നേടിയവര്‍ക്ക് പി.ടി.എ പ്രസിഡന്റ് പി.എം സൈതാലിക്കുട്ടി, എസ്.എം.സി ചെയര്‍മാന്‍ കെ.ടി മുസ്തഫ കമാല്‍, എം.പി.ടി.എ പ്രസിഡന്റ് വി.ജ്യോതി എന്നിവര്‍ പുരസ്‌കാരങ്ങള്‍ വിതരണം ചെയ്യും.
ചടങ്ങില്‍ കെ.കെ അബ്ദുള്ളക്കുട്ടി ഹാജി മുഖ്യാതിഥിയാകുമെന്ന് സംഘാടക സമിതിഭാരവാഹികളായ അന്നമ്മ വള്ളിയാംതടത്തില്‍, എം ഗോപാലന്‍, എം ആനന്ദ്കുമാന്‍, കെ.വി ഹമീദ്, കെ.ടി മുസ്തഫ കമാല്‍ എന്നിവര്‍ അറിയിച്ചു.